Vüqar Nadirovla yollarını ayıran “Haypers”in yeni baş məşqçi axtarışı uzun çəkməyib.

Prosport.Az xəbər verir ki, II Liqa təmsilçisi vakant postu Bəhram Şahquliyevə tapşırıb. O, mövsümün sonunadək Quba komandasını çalışdıracaq. Qusarlı çalışdırıcının qarşısına I Liqaya vəsiqə uğrunda mübarizə aparmaq vəzifəsi qoyulub.

II Liqanın debütantı 9 tura 18 xal toplayıb. Mövsümün geridə qalan hissəsində 6 qələbə əldə edən və 3 dəfə məğlubiyyətlə üzləşən şimal komandası turnir cədvəlinin 4-cü pilləsində qərarlaşıb.

Bu çempionat Bəhram Şahquliyevə tanışdır. O, ötən mövsümün 2-ci yarısınadək “Şahdağ Qusar”ın sükanı arxasında olub (Sportinfo.az).

Yayda isə yenidən “Zirə”yə qayıdıb. 2014/2015 mövsümündə “qartallar”la I Liqada debüt etmiş məşqçi “Haypers”dən təklif gələnə kimi "Zirə" Akademiyasında fəaliyyət göstərib.