Azərbaycan Gənclər və İdman Nazirliyi (AGİN) İxtisaslaşdırılmış Uşaq-Gənclər Olimpiya Ehtiyatları Futbol Məktəbinə yeni təyinat reallaşdırıb.

Prosport.Az fanat.Az-a istinadən xəbər verir ki, “Kazbek Tuayev məktəbi” kimi tanınan mərkəz Mehman Əlimova tapşırılıb.

Əlimov 2015-ci ildən "Neftçi"də təşkilati işlər üzrə menecer vəzifəsində çalışıb. O, hazırda AGİN-in idman şöbəsinin müdiri Elnur Məmmədovun kadrı sayılır. Belə ki, 37 yaşlı mütəxəssis məhz Məmmədovun "Neftçi"nin icraçı direktoru olduğu dövrdə kluba gəlib. Əlimov əvvəllər AFFA-da da çalışıb.

Qeyd edək ki, 30 ildən artıqdır İxtisaslaşdırılmış Uşaq-Gənclər Olimpiya Ehtiyatları Futbol Məktəbinin direktoru postunu tutan Kazbek Tuayev gənclər və idman naziri Fərid Qayıbovun əmri ilə vəzifəsindən kənarlaşdırılıb. Struktur və kadr islahatı aparan nazir "Neftçi"nin 82 yaşlı sabiq baş məşqçisini, hazırda AFFA İcraiyyə Komitəsinin üzvü kimi fəaliyyətini davam etdirən Tuayevi təqaüdə göndərib.