Azərbaycan milli komandasının UEFA Millətlər Liqasının C Divizionunda Estoniya yığması ilə keçirəcəyi V tur oyununun hakim təyinatları açıqlanıb.

Prosport.Az xəbər verir ki, Qəbələ şəhər stadionunda təşkil olunacaq görüşü Şotlandiyadan olan hakimlər briqadası idarə edəcək.

Matçın baş hakimi Con Bayton olacaq. Bu referi daha əvvəl 4 dəfə “Qarabağ”ın avrokubok matçlarıına, 1 dəfə Azərbaycanın U-19, bir dəfə isə U-21 yığmasının oyunlarına təyinat alıb. O sonuncu dəfə Ağdam klubunun UEFA Avropa Liqasının əsas mərhələsinin III turunda Bakıda “Ayaks”a 0:3 hesabı ilə uduzduğu matçda iş başında olub. 42 yaşlı referi həmin qarşılaşmada “Qarabağ”ın 2 futbolçusuna – Juliu Romau ilə Elvin Cəfərquliyevə qırmızı vərəqə göstərib. Oyundan sonra Qurban Qurbanov bu idarəçiliyi pisləyib.

Azərbaycan – Estoniya oyununda C.Bitona yan xətt hakimləri Daniel MakFarleyn və Deyvid Makqiçi kömək edəcək. 4-cü hakim funksiyasını Metyu MakDörmid yerinə yetirəcək.

VAR hakimi Endryu Dalas, onun köməkçisi Nikolas Volş olacaq. Hakimlərin işinə albaniyalı Albano Yanko qiymət verəcək. UEFA nümayəndəsi polşalı Eva Qayevska təyin edilib.

Qeyd edək ki, noyabrın 16-da Qəbələ şəhər stadionunda keçiriləcək qarşılaşma saat 18:00-da başlayacaq.