Avropa çempionatına hazırlığını davam etdirən qadın voleybolçulardan ibarət Azərbaycan millisi Bakıda növbəti yoxlama oyunlarını keçirib.

Prosport.Az xəbər verir ki, Faiq Qarayevin baş məşqçisi olduğu kollektiv ölkədə təlim-məşq toplanışında olan Latviya millisi ilə iki dəfə qarşılaşıb.

Azərbaycan yığması hər iki görüşdə qələbə qazanıb. İlk oyun 3:2, ikinci qarşılaşma isə 3:0 hesabı ilə başa çatıb.

Gənclər və İdman Nazirliyinin Voleybol Mərkəzində keçirilən görüşləri Azərbaycan Voleybol Federasiyasının rəhbərliyi də izləyib.

Qeyd edək ki, Azərbaycan millisi Avropa çempionatında C qrupunda mübarizə aparacaq. Yığmanın rəqibləri Portuqaliya, Niderland, Belçika, Rumıniya və İspaniya olacaq.

C qrupunun oyunları avqustun 21-dən 28-dək Bakıdakı Milli Gimnastika Arenasında keçiriləcək.