Şimali Makedoniyanın paytaxtı Skopyedə keçirilən gənclər arasında cüdo üzrə Avropa Kuboku başa çatıb.

Prosport.Az xəbər verir ki, yarışın son günündə Azərbaycan milli komandası 2 qızıl və 4 bürünc medal qazanıb.

Xədicə Qədəşova (-57 kq) və Davud Namazlı (-100 kq) bütün rəqiblərinə qalib gələrək turnirin qalibi olublar.

Nərgiz Əhmədova və Gülgəz Musayeva (hər ikisi -48 kq), Aytən Verdiyeva (-57 kq) və Canpolad Əliyev (-100 kq) isə yarışın bürünc medalına sahib çıxıblar.

Qeyd edək ki, Azərbaycan yığmasının digər üzvü Nilgün Rzayeva (-63 kq) turnirin ilk günündə üçüncü yeri tutub.

Beləliklə, millimiz 2 qızıl və 5 bürünc olmaqla ümumilikdə 7 medalla 33 ölkənin iştirak etdiyi Avropa Kubokunu komanda hesabında üçüncü pillədə başa vurub.