Azərbaycanın cüdo üzrə dünya və Avropa çempionu, hazırda isə Zelim Kotsoyevin şəxsi məşqçisi olan Elxan Məmmədovun Prosport.Az saytına müsahibəsi

– İlk dəfə Azərbaycan cüdoçuları bir Olimpiadada 2 qızıl medal qazandı. Əvvəlcə bu barədə təəssüratlarınızı bilmək maraqlı olardı...
– Azərbaycan adına həqiqətən böyük nəticədir. Dünyada ön sıralarda olmaq ciddi uğurdur. Bunun arxasında Azərbaycan Cüdo Federasiyası, Gənclər və İdman Nazirliyi, eləcə də Milli Olimpiya Komitəsinin birgə fəaliyyəti dayanır. Bu qələbə münasibətilə xalqımızı, Ali Baş Komandanı, bir sözlə hər kəsi ürəkdən təbrik edirəm.

– Olimpiadadan öncə Cüdo Federasiyasının rəsmiləri mətbuata müsahibələrində bütün cüdoçulardan medal gözlədiklərini deyirdi. Siz idmançılarla işləyirsiniz, onların potensialın daha yaxşı bələdsiniz. Şəxsən Elxan Məmmədov Parisdə 2 qızıl medal gözləyirdi?
– Əlbəttə. Cüdo Federasiyasının hər bir idmançı üzərində haqqı var. Federasiya rəhbərliyi əlindən gələni edir və bu mənada idmançıların hamısından medal gözləyirdi. İdmanda hər şey baş verə bilər. Yadınızdadırsa, bu il Əbu-Dabidəki dünya çempionatından sonra müsahibə vermişdim və həm Zelim Kotsoyevdən, həm də Hidayət Heydərovdan olimpiya qızılı gözlədiyimi bildirmişdim. Çünki dünya çempionatında nəticə vermək olimpiya çempionluğuna bərabərdir. Dünya çempionatında çox gözəl çıxış etdilər və qazandıqları nəticələrə görə onlara inanırdım, qızıl medal gözləyirdim. Şükürlər olsun ki, etimadı boşa çıxarmadılar. Həqiqətən çox böyük uğura imza atdılar.

– Digər cüdoçular Olimpiadanı mükafatsız başa vurdu. Medal gözlədiyiniz hansı idmançılar ümidləri doğrultmadı?
– Cüdo elə idman növüdür ki, burada nəyisə əvvəldən demək olmur. Amma Elcan Hacıyevin məğlubiyyəti bizi çox üzdü. Yaşar Nəcəfovdan, Balabəy Ağayevdən, Zelim Tçkayevdən də medal gözləyirdik. Təəssüf ki, alınmadı.

– Kotsoyevin çıxışları barədə nə deyə bilərsiniz? Xüsusilə final görüşü çox dramatik alındı. Son saniyələrədək hesabda geridə idi. Artıq çoxları düşünürdü ki, qızıl medal əldən getdi. Həmin anlarda siz hansı hissləri keçirdiniz?
– Zelimin şəxsi məşqçisi kimi deyə bilərəm ki, biz bu günü 3 ildir gözləyirdik. Bəlkə də hər gün şüuraltı olaraq onun beyninə olimpiya çempionu olacağını yeridirdim. Hər məşqimizdə, onu hər görəndə deyirdim ki, sən bunu bacaracaqsan. Hidayət çempion olanda dedim ki, Zelim, görürsən, necə asandır. Hidayət etdi, sən də bacararsan. Soruşdu ki, mənə inanırsınız? Bildirdim ki, mən sənə həmişə inanmışam, sadəcə, sən özünə inan, qalib gələcəksən. Hesabda geri olarkən ətrafdakılar qızıl medalın itirildiyinə təəssüflənirdilər, amma mən sona qədər inanırdım. Bilirdim ki, nəsə edəcək. Özünüz də gördünüz ki, sona saniyələrədək pressinqi, savaşması olimpiya çempionluğunu gətirdi.

– Siz özünüz həm Avropa, həm də dünya çempionu olmusunuz. Amma kolleksiyanızda olimpiya medalı yoxdur. Bu mənada demək olarmı ki, Kotsoyev sizin yarım qalan arzunuzu reallaşdırdı?
– Çox gözəl vurğuladınız. Azərbaycan adına dünyada Olimpiya Oyunlarından başqa, bütün yarışların qalibi olmuşam. Hər zaman arzum olub ki, olimpiya çempionu olum, Cənab Prezidentlə görüşüm və qızıl medalı ona təqdim edim. İdmançı kimi alınmadı, qismət olmadı. Amma məşqçi kimi bunu bacardım. Demək olar ki, mənim yarım qalan işimi Zelim tamamladı.

– Zelim olimpiya çempionu olduqdan sonra müsahibəsində bildirdi ki, hətta karyerasını başa vurmaq istəyirmiş. Karyerasını bitirmək istəyi o deməkdir ki, bu idmançıda artıq heç nə alınmır. Əlini hər şeydən üzən birini olimpiya çempionu etdiniz. Bunu necə bacardınız?
– Çünki bunları mən özüm də yaşamışam. İdmançının eniş və yüksəliş dövrü olur. Eniş vaxtı, sadəcə, onun yanında olmaq, motivasiya vermək lazımdır. Zelim mənim üçün həm tələbə, həm dost, həm övladdır. Uduzanda da, udanda da yanında olmuşam. Həyatda hər şey olur. O, mənim üçün bir övladdır. Hər zaman demişəm ki, zaman gələcək, sən dünya və olimpiya çempionu olacaqsan. Şükürlər olsun ki, bu günləri gördük.

– Əvvəlki illərin təcrübələrindən də görmüşük ki, olimpiya çempionu olan idmançıların karyeralarında sonradan eniş dövrü başlayır, hətta idmanı atanlar da olur. Necə düşünürsünüz, Hidayət və Zelim "ulduz xəstəliyi"nə tutulmayacaq?
– Bizdə bu söhbət hər zaman olub. Elnur Məmmədli, Namiq Abdullayev və Fərid Mansurov kimi idmançılarımız olimpiya çempionluğundan sonra dünya və Avropa çempionatışlarında yer tutub. Sadəcə, zədə üzündən idmandan kənarlaşıblar. Mən Zelim və Hidayətdə bunları görmürəm. Zelim çox sadə insandır. Hidayət də artıq olimpiya çempionluğunu dadıb. Onlarda "ulduz xəstəliyi"nin olacağına inanmıram. Çünki indidən Los-Anceles Olimpiadasını düşünürlər. Olimpiya Oyunları öncəsi idmançılar çox ciddi hazırlıq keçir. Ona görə də Olimpiadadan sonra müəyyən zədələr baş qaldırır. Los-Ancelesdə də hər ikisindən olimpiya çempionluğu gözləyirik.

– Hər cüdoçumuz olimpiya çempionu olduqdan sonra Prezident İlham Əliyev zəng edərək onları şəxsən təbrik etdi...
– Nəinki idmanda, hər bir sferada ölkə rəhbərliyinin dəstəyi hiss olunur. Cənab Prezidentin, I vitse-prezident Mehriban Əliyevanın bu uğurda böyük zəhməti var. Öz adımdan onlara təşəkkürümü bildirirəm. Ölkə başçısı Hidayətə zəng vurub təbrik edəndə Zelimə dedim ki, görürsən, hər şey diqqətdədir. Bildirdim ki, biz qalib xalqıq, sən bunu etməlisən, bizə qələbə yaraşır. Çox sevinirik ki, çəkilən əziyyətin, göstərilən qayğının qarşılığını verdik.