"Allaha şükürlər olsun ki, bu gün Türkiyə tarix yazır. Bu tarix Türkiyə Taekvondo Federasiyasının tarixində bir ilkdir. Daha öncə də çempionluqlarımız olub. Bundan əvvəl də qızıl medallar qazanmışıq. Lakin bu dəfə bir ilk baş verdi. Bakıda qadınlar arasında dünya çempionu olduq. Bu bizim üçün çox önəmli idi".

Prosport.Az-ın xəbərinə görə, bunu Türkiyə Taekvondo Federasiyasının prezidenti Mətin Şahin deyib.

Bakıda keçirilən taekvondo üzrə sayca 26-cı dünya çempionatının bağlanış mərasimi keçirilib. 3 qızıl və 3 bürünc medal qazanan Türkiyə federasiyasının prezidenti sevinc hisslərini bildirib: "İlk dünya çempionluğu Mərvə Dinçərlə başladı və ardınca bu davam etdi. Milli komandanın üzvləri Nafia Kuş və Hakan Rəçbərin qazandığı qızıl medallar və digər taekvondoçularımızın qazandığı bürünc mükafatlarla uğurlu seriya sonacan davam etdi. Bu gün biz çox sevinc hissi keçirdik. Həddindən çox qürurvericidir ki, qardaş ölkə Azərbaycanda bu çempionluğu yaşayırıq. Bütün bunlar isə çox böyük səbir və əməyin bəhrəsidir. Bundan başqa, dünya çempionatının ən yaxşı qadın taekvondoçusu da Türkiyə qadın millisinin üzvü Mərvə Dinçər seçildi. Ən yaxşı qadın taekvondo yığmasının baş məşqçi də Ali Şahin seçildi. Mən onları təbrik edirəm. Türkiyə millisi həqiqətən də çox böyük bir nailiyyətə imza atdı. Hədəfimiz Paris-2024 Olimpiya Oyunlarıdır. İnşallah orada da böyük nailiyyətlər qazanacağımıza inanıram".