Serbiyanın paytaxtı Belqradda keçiriləcək Avropa çempionatında iştirak edəcək Azərbaycan taekvondoçuları bəlli olub.

Prosport.Az xəbər verir ki, mayın 9-12-də təşkil olunacaq turnirdə ölkəmizi 12 idmançı təmsil edəcək. Onlardan 8-i kişi, 4-ü isə qadın taekvondoçudur.

Baş məşqçi Məmməd Abdullayev və böyük məşqçi Elnur Amanov yarışda Səyyad Dadaşov (54 kq), Həşim Məhəmmədov (58 kq), Riyad Şirəliyev (63 kq), Yaşar Məmmədli (68 kq), Cavad Ağayev (74 kq), Eltac Qafarov (80 kq), Taleh Süleymanov (87 kq) və Həmidrza Bədriəliabadiyə (+87 kq) şans verəcək.

Qadınlardan ibarət yığmanın baş məşqçisi Sun Mi Parkla böyük məşqçi Seul Bi Li isə çempionatda Zemfira Həsənzadə (46 kq), Məryəm Məmmədova (49 kq), Nigar Abdullayeva (53 kq) və Leyla Bəşirovanı (57 kq) sınayacaq.

Yarışda beynəlxalq dərəcəli hakimimiz Aygül Abdullayeva referilər sırasında yer alacaq.

Bu gün səfərə yollanan komandaya Azərbaycan Taekvondo Federasiyasının Nəzarət-Təftiş Komitəsinin sədri Anar Surxayzadə rəhbərlik edəcək.