29 may tarixində başlayan və Bakıda keçirilən taekvondo üzrə dünya çempionatı bu gün başa çatıb.

Prosport.Az-ın xəbərinə görə, son gündə fərdi şəkildə mükafatlandırılma mərasimi keçirilib.

13 idmançı ilə təmsil olunan Azərbaycan millisi medal qazana bilməsə də, Ümumdünya Taekvondosu tərəfindən Döyüş Ruhu Mükafatına layiq görülüb. Mükafat gənclərdən ibarət millimizin böyük məşqçisi Zahid Məmmədova təqdim olunub.

Daha sonra digər fərdi mükafatlar təqdim edilib:

Aktiv iştirak mükafatı: Kanada millisi
Ən dəyərli kişi idmançısı: Park Tae-coon (Cənubi Koreya)
Ən dəyərli qadın idmançısı: Mərvə Dincəl (Türkiyə)
Ən yaxşı kişi məşqçisi: An Honq-youb (Cənubi Koreya)
Ən yaxşı qadın məşqçisi: Ali Şahin (Türkiyə)
Ən yaxşı kişi referisi: Ayman Adarbeh (İordaniya)
Ən yaxşı qadın referisi: Byunq Hee Kim (Bruney)

Daha sonra komandalar üzrə mükafatlar təqdim olunub. Kişi taekvondoçuların komanda hesabında Cənubi Koreya çempion olub. Xorvatiya 2-ci, Türkiyə, İtaliya və Fil Dişi Sahili 3-cü yeri tutub. Qadınların mübarizəsində Türkiyə çempion olub, Fransa 2-ci, Xorvatiya, Macarıstan və İran 3-cü olub.

Qeyd edək ki, ümumi (kişi və qadınlar birgə) medal əyarına görə Cənubi Koreya 1-ci olub. Şərqi asiyalılar 3 qızıl və 1 gümüş medal qazanıb. Türkiyə də 3 qızıl və əlavə 3 bürünc medal qazansa da, gümüş mükafatın olmaması səbəbindən 2-ci olub. Xorvatiya isə 2 qızıl, 1 gümüş və 3 bürünc medalla 3-cü yeri tutub.

Səbuhi Musa