Bu gün Bakıda keçirilən taekvondo üzrə sayca 26-cı dünya çempionatı Azərbaycan üçün başa çatıb.

Prosport.Az xəbər verir ki, Azərbaycanın son 2 idmançısı da mübarizəni medal qazanmadan başa vurub.

Belə ki, bu gün qadınlar  arasında 53 kq, kişilərin garışında isə +87 kq çəki dərəcələrində taekvondoçular mübarizəyə qoşulublar. Ən ağır çəkidə mübarizə aparan İran əsilli legionerimiz Həmidrza Bədriəliabadi 1/16 finalda Nuum Diavara (Mali) və 1/8 finalda Ömər Əl-Yezidiyə (Fransa) qalib gəlsə də, 1/4 finalda ötən ilin Avropa çempionu Əmrə Kutalmış Atəşli ilə bacara bilməyib.

Yığma komandanın daha bir idmançısı Səmərrux Osmanova isə ilk görüşündə Mariela Bu Habibə (Livan) uduzaraq çempionatı erkən tərk edib. 

Qeyd edək ki, dünya çempionatında 145 ölkədən 949 idmançı 16 dəst medal uğrunda mübarizə aparır. Artıq 14 dəst medal sahibini tapıb. Bu gün daha bir cüt medal sahibinə qismət olacaq. Bakıda keçirilən dünya çempionatına 13 idmançı ilə qatılan Azərbaycan millisi fiaskoya uğrayıb və doğma divarlar arasında medal qazana bilməyib.