Taekvondo millimiz Olimpiadaya lisenziya qazanmaq üçün fiasko nəticə ilə üzləşib.

Prosport.Az xəbər verir ki, Bolqarıstanın paytaxtı Sofiyada keçirilən Avropa Olimpiya Təsnifat Turnirinə 3 idmançı ilə qatılan millimiz lisenziya qazana bilməyib.

Olimpiya mükafatçımız, ikiqat dünya və Avropa çempionumuz Milad Beiqi (+80 kq) 1/8 finalda Andreas Teoxarusa (Kipr) qalib gəlsə də, 1/4 finalda ikiqat Avropa mükafatçısı Rikard Uremanna (Norveç) uduzaraq mübarizəni dayandırıb.

Qadın millimizdən Zemfira Həsənzadə (49 kq) ikiqat Avropa mükafatçısı Ela Aydına (Almaniya), Nigar Abdullayeva (57 kq) isə Melani Kindlə (Avstriya) uduzub.

Qeyd edək ki, Paris Olimpiadasına ötən il Azərbaycandan yalnız Dağıstan əsilli Həşim Məhəmmədov (58 kq) lisenziya qazana bilib.