"Qarabağ"ın futbolçusu Qara Qarayevin Prosport.Az saytına müsahibəsi
– Çempionluq hisslərinizi bildirərdiniz...
– Bu komandanın uğurlarının tərkib hissəsi olmaq məni sevindirir. Həyatımın ən önəmli titullarını, uğurlarını "Qarabağ"da qazanmışam. Ard-arda çempionluqlar qazanmaq, loqomuza 2-ci ulduzu əlavə etmək məni qürurlandırır. Hər kəsə təşəkkür edirəm. Bizdən çempionluqları almaq istəyən çox komandalar olub. Şükürlər olsun ki,biz bunu verməmişik.
– Bu çempionluq sanki əvvəlki illərlə müqayisədə bir az çətin oldu. Siz necə düşünürsünüz?
– Bəli. Bu çempionluq daha çox güc sərf etməyimizə səbəb oldu. 8 il ard-arda çempion olmuş komandanı hər kəs dayandırmaq istəyirdi. Rəqiblərin bizə qarşı göstərdiyi aqressiya, titulu əlimizdən almaq istəyi normaldır. Bu, futbolun inkişafı üçün önəmlidir. Ümid edirəm ki, gələn il yenə çempion olacağıq. Əvvəllər bəzi komandaları daha rahat məğlub edirdiksə, indi bu, baş verə bilmir. Çünki hər kəs oynayır, çempiondan xal almaq istəyir. Hamı bizə qarşı daha motivasiyalı olur.
– Bəzi futbolçuların müqaviləsi bitir. Dəyişikliklər komandaya necə təsir edəcək?
– Bununla bağlı əsas fikri baş məşqçimiz Qurban Qurbanov bildirə bilər. Biz idmançı kimi yanaşırıq. Qurban müəllim isə həm məşqçi, həm rəhbər kimi yanaşır. Müqaviləsi bitən futbolçularla bağlı qərar baş məşqçiyə məxsusdur. İllərdir bu uşaqlarla çiyin-çiyinə "döyüşürəm". Son 10 ildə klubda olanları ailəmdən, dostlarımdan çox görürəm. Çətin və yaxşı günlərimiz bir yerdə olub. Ayrılmaq bizim üçün heç də asan deyil. Amma futbolçu karyerası belədir. İstəməsən belə, ayrılıqlar baş verə bilər.
– Juliu Romau gələndən sonra az şans qazanırsınız. Nə düşünürsünüz?
– Heç nə düşünmürəm. Beynimdə neqativ heç nə yoxdur. Juliu komanda yoldaşımdır. Kimsə mənə həmişə əsas heyətdə oynamaq zəmanəti verməyib. "Qarabağ"da 500-dən çox oyun keçirmişəm, komandanın ən önəmli uğurlarında yer almışam. "Mübarizəni uduzdum" deyə bir söz işlətmək istəmirəm. Düşünürəm ki, komanda yoldaşım oynayırsa, buna layiqdir. Mən də onu həmişə dəstəkləyirəm. Amma öz yerim üçün də mübarizə aparıram, mən də oynamaq istəyirəm.