Kikboksinq üzrə millimiz Portuqaliyanın Albufeyra şəhərində keçirilən dünya çempionatında rekorda imza atıb.

Prosport.Az xəbər verir ki, 17-26 noyabr tarixlərində baş tutan yarışda idmançılarımız 11 medal qazanıb.

Onlardan 4-ü qızıl, 1-i gümüş, 6-sı bürünc mükafat olub. Surət Qarayev (91 kq, Full kontakt), Sübhan Məmmədov (51 kq, Lou kik), Elvin Məmmədov (54 kq, Lou kik), Amin Quliyev (60 kq, Lou kik) qızıl, Orxan Məlikov (91 kq, Lou kik) gümüş, Ramiz Məmmədov (57 kq, Full kontakt), Fərid Ağamoğlanov (63,5 kq, Full kontakt), Qəşəm Məmmədov (75 kq, Lou kik), Rauf Gərayzadə (81 kq, Lou kik), Elcan Alkişiyev (86 kq, Lou kik) və Allahverdi Dəmirov (51 kq, K1) bürünc medala yiyələnib. Bundan başqa, 63 kq çəki dərəcəsində çıxış edən Eduard Məmmədov veteranlarda kikboksinqin Layt kontakt və Kik layt növləri üzrə dünya çempionu olub.

Bəs ötən dəfəki dünya çempionatında nəticələr necə olub? Prosport.Az müqayisə aparıb. 

2021-ci ildə İtaliyanın Yezolo şəhərində keçirilmiş son dünya çempionatında komandamız yalnız 1 qızıl medal qazanıb. Bu, Anar Məmmədov (57 kq, Lou kik) olub. Ümumiyyətlə, həmin dünya çempionatında Azərbaycan kikboksçuları 8 medal – 1 qızıl, 4 gümüş və 3 bürünc medal qazana bilib. Həmin vaxt Camal Məmmədov (54 kq, Full kontakt), Qəşəm Məmmədov (67 kq, Lou kik), Rəhim Əliyev (71 kq, Lou kik) və Rəmal Aslanov (75 kq, Lou kik) finalda uduzmuş, Ayxan Məmmədzadə (51 kq, Lou kik), Elcan Alkişiyev (81 kq, Lou kik) və Əsgər Rəhimov (57 kq, K1) bürünc medala yiyələnmişdi. Bundan başqa, Eduard Məmmədov (63 kq) Kik layt versiyası üzrə veteranlar arasında dünya çempionu olmağı bacarmış, Emin Abdullayev (+94 kq) isə bürünc medal qazanmışdı.   

Göründüyü kimi, bu dəfə nəticələr daha da yaxşılaşıb. Belə ki, böyüklərin (senyorlar) yarışında yenə 5 final olub, ancaq bu dəfə daha 3 gümüş qızılla əvəzlənib.