İlk dəfə Niderlandın Rotterdam şəhərində keçirilən Avropa para çempionatında Azərbaycan parataekvondoçusu Əbülfəz Abuzərli (80 kq, K44 kateqoriyası) qızıl medal qazanıb.

Prosport.Az-ın xəbərinə görə, yarımfinalda Oktay Atalayı (Türkiyə) 15:5 hesabı ilə məğlub edən Əbülfəz finalda Serbiya idmançısı Nikola Spayiçlə görüşdə möhtəşəm geridönüş etməyi bacarıb.

Əbülfəz Abuzərli ilk hissədən sonra 0:5 hesabı ilə geridə olub. Görüşün bitməsinə son 3 saniyə qalmış 6:9 uduzan idmançımız nəticədə möcüzəyə imza atıb. O, 4 xal qazanaraq 10:9 hesabı ilə qalib gəlib.

Qeyd edək ki, daha əvvəl taekvondoçularımızdan İmadəddin Xəlilov (70 kq) qızıl, Röyalə Fətəliyeva (52 kq) gümüş və Sabir Zeynalov (58 kq) bürünc medal qazanıb. Görmə məhdudiyyətli cüdoçularımız isə bu yarışda 2 qızıl, 3 gümüş və 2 bürünc medal əldə etməyi bacarıb. Azərbaycan cüdoda Ukraynadan sonra 2-ci ən yaxşı nəticəni göstərib.

Onu da bildirək Azərbaycan hazırda Avropa para çempionatında 4 qızıl, 4 gümüş və 3 bürünc medalla 4-cü sıradadır. İlk 3 sırada meydan sahibi Niderland, Türkiyə və Ukraynadır.