"Sumqayıt"da maliyyə çatışmazılığı mövcuddur. Premyer Liqada mövsümü 7-ci pillədə başa vuran "gənclik şəhəri" təmsilçisi 3 aya yaxındır əməkhaqqı üzünə həsrətdir.

Prosport.Az xəbər verir ki, bu barədə sportinfo.az-a "kimyaçılar"ın düşərgəsindən məlumat verilib. Bildirilib ki, komanda üzvləri sonuncu dəfə fevral ayının maaşlarını alıblar.

İdarəçilər bu mövzuda onlara edilən müraciətə birmənalı cavab verməyib. Ödəmələrin nə vaxt həyata keçiriləcəyini demirlər.

"Düzələcək, bir az gözləyin" - cavab yalnız bundan ibarətdir.

Komanda üzvlərinin sözlərinə inansaq, yeni ildən sonra nəticələrdə qeydə alınan uğursuz nəticələrin əsas səbəbi budur.

Məvaciblər gecikdirildiyindən, futbolçularda ruh düşkünlüyü yaranıb və qələbəsizlik seriyası 10 oyuna qədər uzanıb.

Üstəlik, martdan sonra mükafat fondu "dondurulub". Rəhbərlik avrokuboklara vəsiqə şansının itməsini əsas gətirərək, belə bir qərar qəbul edib.