III MDB Oyunlarında karatedə 4-cü medalı Turqut Həsənov əldə etdi. 32 yaşlı idmançı A qrupunda Qleb Saçkovskini (Belarus) 2:1, Safiulloh Zarifovu (Tacikistan) 10:4, Konşau-bi Kurmanovu (Rusiya) 4:1 və yarımfinalda Şuxratcon Namazovu (Özbəkistan) 5:0 məğlub edərək finala yüksəldi. O daha sonra finalda yenə Konşau-bi Kurmanovu 7:4 məğlub etməklə qızıl medal qazandı.

Prosport.Az-ın Mingəçevirə ezam olunmuş əməkdaşı Turqut Həsənovdan müsahibə götürüb:

– Həyəcan vardımı?
– Həyəcan sözsüz ki, vardı. Qələbə hissi çox gözəldir. Özü də bunu öz torpağımızda əldə etmək əla hissdir. Qolum zədəli idi. Allah qismət etdi ki, qızıl medal qazanım. Üzərimdə əziyyəti olan hər kəs çox sağ olsun.

– Qarşılaşdığınız rəqiblərlə tanış idiniz?
– Bəli. Hamısını analiz etmişdik.

– Kumitedə bütün görüşlərdə qələbə qazanıb qızıl medal qazanan ilk idmançımız oldunuz. Bu barədə nə deyə bilərsiniz?
– 2 görüşüm çətin oldu. Rəqibi tanıyırdım, çoxdandır ki, onu analiz edirdik. Şükürlər olsun ki, analiz bəhrəsini verdi.

– Bundan sonrakı hədəf nədir?
– 1 həftə sonra Fransanın paytaxtı Parisdə dünya çempionatına lisenziya yarışına qatılacağıq. 17-19 oktyabrda orada yarış olacaq. Növbəti yarış İslam Həmrəylik Oyunlarıdır. Lisenziya qazansam, noyabrda da Misirdəki dünya çempionatına qatılacağam.

Səbuhi Musa