"Neçə vaxtdır ki, MDB Oyunlarına hazırlaşırdıq. Bura çempion olmağa gəlmişdim. Şükür Allaha, çempionluq nəsib oldu".

Bunu Prosport.Az-ın III MDB Oyunları üçün Mingəçevirə ezam olunmuş əməkdaşına müsahibəsində taekvondoçu Ziya Həsənli deyib.

O, 1/4 finalda Layiq Dövlətzadəyə (Tacikistan) 2:0, yarımfinalda Maksim Bondareviçə (Belarus) 2:0 və finalda Yeqor Lakiyə (Rusiya) 2:1 qalib gəlməklə Azərbaycana III MDB Oyunlarında ilk qızıl medalı qazandırıb.

Gənc idmançı çempionluq hisslərini bölüşüb: "Final bir az çətin keçdi. Ancaq şükürlər olsun ki, qalib gəldim. Tarixə ilk qızıl medalçı kimi düşmək çox gözəl hissdir. İnşallah, növbəti hədəfim olimpiya çempionu olmaqdır".

Qeyd edək ki, Azərbaycan bu gün taekvondoda 11 medal (3 qızıl, 2 gümüş, 6 bürünc) qazanıb. Taekvondoçularımızdan Ziya Həsənli (63 kq) tarixi uğura imza ataraq III MDB Oyunlarının ilk qızıl medalını ölkəmizə qazandırıb. Bundan başqa, Humay Dadaşova (46 kq) və Məryəm Məmmədova (53 kq) bütün rəqiblərini üstələyərək çempion olub. Elcan Əliyev (74 kq) və Ümid Rəhimzadə (54 kq) gümüş, Səlimə Quliyeva (46 kq), Nilufər Borji (53 kq), Tamerlan Yaqubov (54 kq), Allahverdi Məmmədov, Zeynal Əliyev (hər ikisi 87 kq) və Nərgiz Kazımova (62 kq) bürünc medallara sahib çıxıb.

Səbuhi Musa