"Qarabağ"ın yeni transferi Kamilo Duran səfərdə "Karvan-Yevlax"a 2:0 hesabı ilə qalib gəldikləri Misli Premyer Liqasının III tur matçından sonra Prosport.Az-ın suallarını cavablandırıb:

- Oyun barədə fikirləriniz necədir?
– Sevinirik ki, mənə belə bir imkan yaradıldı. Böyük bir kluba qoşulduğum üçün çox xoşbəxtəm. İlk dəqiqələrimi qazandım və inanıram ki, hələ çox oyunda komandama kömək edəcəyəm.

- Çempionlar Liqasındakı rəqiblər haqqına hansı fikirdəsiniz?
– Rəqiblər barədə əlavə təqdimata ehtiyac yoxdur. Çünki bunlar "Liverpul", "Çelsi", "Benfika" kimi dünya səviyyəli klublardır. Onların gücü hər kəsə məlumdur, dünya səviyyəlidirlər. Ümid edirəm ki, həmin oyunlara maksimum dərəcədə yaxşı hazırlaşıb, yüksək performans göstərməyə çalışacağıq.

- Azərbaycana gəlməzdən əvvəl “Qarabağ” haqqında nə bilirdiniz, avrokuboklarda çıxışını izləyirdiniz?
– İki mövsüm əvvəl Avropa Liqasında Portuqaliyada "Braqa" ilə pley-off oyunu canlı izləmək imkanım olmuşdu. Həmin oyunda diqqətimi çəkmişdi ki, bu, Azərbaycanın ən yaxşı klubudur. İndi bu komandanın üzvü olduğum üçün çox xoşbəxtəm.

- Azərbaycanda çıxış edən kolumbiyalı futbolçular haqqında fikirləriniz, həmçinin ligaya yeni qoşulan Edvin Bangeranı əvvəldən tanıyırdınızmı?
– Bəli, tanıyırdım. "Portimonense"də olarkən ona qarşı oynamaq imkanım olmuşdu. Yaxşı futbolçudur. Ümumiyyətlə, düşünürəm ki, kolumbiyalı futbolçular keyfiyyətli oyunçulardır. Ölkəmizi burada yaxşı təmsil etməyə çalışacağıq.

- Azərbaycana gəlməzdən əvvəl hansısa futbolçu ilə məsləhətləşmişdiniz?
– Bəli, Kevin Medina ilə danışmışdım. O, mənə buranın ən yaxşı klub olduğunu, hər şeyin yüksək səviyyədə təşkil edildiyini dedi və bu da mənim gəlişim üçün böyük motivasiya oldu.

- Meydanda hansı mövqedə özünüzü rahat hiss edirsiniz və öz oyun üslubunuzu necə xarakterizə edərdiniz?
– Sağ cinah yarımmüdafiəçisi kimi özümü rahat hiss edirəm. Luis Diasın oyun tərzini çox bəyənirəm və o, həmişə mənim üçün nümunə olub. Daha çox onun oyun tərzinə yaxın oynamağa çalışmışam.