"Araz-Naxçıvan" Misli Premyer Liqasında III turunda doğma meydanda "Qəbələ"ni 2:1 hesabı ilə məğlub edib.
Prosport.Az xəbər verir ki, oyundan sonra keçirilən mətbuat konfransında Naxçıvan klubunun baş məşqçisi Elmar Baxşıyev jurnalistlərin suallarını cavablandırıb.
"Komanda olaraq bilirdik ki, bizi nə gözləyir. "Qəbələ" yaxşı komandadır. Ümumi olaraq ağır oyun idi. Üstünlük bəzən bizdə, bəzən isə onlarda idi".
- Yeni transfer Coşqun Diniyevin mövqeyində bir çox oyunçu var. Bir müddət futboldan kənar qalmasını nəzərə alsaq, son durumu necədir?
- Coşqun istədiyim futbolçu idi. Onun oyununun komandaya faydalı olacağına inanıram. Uzun müddət futboldan kənar idi. Ancaq özünü toparlayacağını da bilirik.
- Gənc futbolçulara şans verən məşqçisiniz. Bu futbolçulardan biri də qolkiper Süleyman Həsənovdur. Onun perspektivi haqda düşüncələrinizi bilmək maraqlı olardı...
- 2-ci hissədə meydanda 6 yerli futbolçumuz var idi. Komandamızda keyfiyyətli yerli futbolçuların olduğunu deyə bilərəm. Süleymana gəldikdə, gənc qapıçıdır. Hazırda Premyer Liqada oynamağa tam hazır olduğunu deyə bilmərik. Amma perspektiv vəd edən qapıçıdır.
- "Omoniya" ilə matçdan sonra bəzi mətbuat orqanlarında sizin komandadan ayrılacağınız haqda məlumatlar yayılmışdı...
- Mən də çalışıram ki, idman mediasını izləyim. Bəzi xəbərlər reallıqdan tamamilə uzaq olur. Məni bura rəhbərlik gətirib. Öz işimi görməyə çalışıram. Təbii ki, qərar onlarındır. Burada olduğum müddətdə üzərimizə nə düşürsə, onu da etməyə çalışırıq. "Omoniya" ilə matçlarda fiaskoya uğradıq. Biz də o nəticəni gözləmirdik. Futbolda sığortalı heç nə yoxdur.
- Bəzi klubların rəhbərləri çempionluğa oynadıqlarını açıqlayıblar. Sizin komandanın belə bir məqsədi varmı?
- Mən məşqçiyəm. Bu sualı rəhbərliyə ünvanlasanız, daha yaxşı olar. Amma onu da qeyd edim ki, çempionluq sözlə olmur. Çempionluq böyük bir əməyin nəticəsində qazanılan uğurdur.
- Ramon Maçadonun son durumu barədə nə deyə bilərsiniz?
- Maçado artıq məşqlərə başlayıb. Milli fasilədən sonra komandaya qoşulacağını gözləyirik.