Misli Premyer Liqasının III turunun “Neftçi” – “Turan Tovuz” oyunundan (0:1) sonra qonaq komandanın baş məşqçisi Qurban Berdiyev jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Çətin oyun oldu. Qələbəyə görə sevinirəm. “Neftçi” bu mövsüm daha yaxşı formalaşıb.

– Sərgilənilən oyundan nə dərəcə razısınız?
– Bəzi məqamlarda biz, bəzilərində “Neftçi” yaxşı oynadı. Rəqib azlıqda qalandan sonra hesabı qorumaq istəyimiz səhvlərə gətirib çıxardı.

– İbrahima Vadjinin oyunundan nə dərəcə razı qaldınız?
– Yavaş-yavaş artırır. Toplanışda iştirak etməmişdi. Bu gün oyuna pis qoşulmadı. Bəzi epizodlarda hücumları daha iti edə bilərdi.

– Çempionluğa oynamaq üçün daha neçə oyunçuya ehtiyac var?
– Mövsüm yeni başlayıb. İstədiyim kimi oynayan komanda yoxdur. Bir neçə transfer planımız var. Mövqelər haqda danışmayacağam.

– Komandanın “vuran ayaq” problemi var. Qollarınızı yarımmüdafiəçi Robert Olabe vurur…
– İstənilən halda, bu məsələ üzərində iş gedir.