"İlk oyundan sonra yaxşı üstünlüyümüz var idi. Cavab matçına yaxşı başlamadıq. Bu cür rəqiblərə şans verəndə dərhal bundan faydalanırlar". 

Prosport.Az xəbər verir ki, bu sözləri “Qarabağ”ın yarımmüdafiəçisi Marko Yankoviç “Ferensvaroş”a qarşı UEFA Çempionlar Liqasının pley-off mərhələsinin cavab oyunu (2:3) barədə danışarkən deyib.

Monteneqrolu futbolçu bildirib ki, “Qarabağ” mərhələ adlamağa layiq idi: “Oyun çox çətin keçdi. Rəqibin daha 3-4 şansı oldu. Kiçik detallar oyuna təsir edir. Xüsusən standart vəziyyətlərdə çətinlik çəkirdik. Bütün bunlara baxmayaraq, cavab oyununda uduzsaq da, yekunda mərhələ adladıq. Bu münasibətlə hər kəsi təbrik edirəm. Mərhələ adlamağa və Liqa mərhələsində oynamağa layiq idik”.

O, Liqa mərhələsində qarşılaşmaq istədiyi komandaların adlarını da açıqlayıb: “Hamı “Barselona” və ya “Real”a qarşı oynamaq istəyər. Bilmirəm, bu, yaxşı ideyadır, ya pis. Lakin seçməli olsaq, “Real”, yaxud “Barselona”nı seçərdim. Düzdür, bu cür nəhənglərə qarşı işimiz çox çətin olacaq. Lakin bu da bir təcrübədir. Oyunlardan həzz almalıyıq”.

M.Yankoviç azarkeşlərdən də söz açıb: “Azarkeşlər bizə əla dəstək verdilər. Onların hər birinə təşəkkür edirəm. Bizə çox yaxşı dəstək oldular. Bu, həm də onların qələbəsidir”.