Misli Premyer Liqasının II turunun “Turan Tovuz” – “Araz-Naxçıvan” oyunundan (1:2) sonra qonaq komandanın baş məşqçisi Elmar Baxşıyev jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə gğrüşlə bağlı fikirlərini bölüşüb.

– Bilirdik ki, bizi bu matçda nə gözləyir. Ağır oyun alındı. Hər iki komanda meydançada yaxşı mübarizə apardı. Bu gün meydanda istədiyimizi etməyə çalışırdıq. İstədiyim komandanı gördüm. Biz də bilirik ki, çempionatın əvvəlidir. Getdikcə, hücum və müdafiə planında daha da yaxşı komanda olacağıq.

– Mövsümə tez başlamağınız üstünlükdür, yoxsa “Omoniya”ya məğlubiyyətlər psixoloji cəhətdən təsir edib?
– Bu gün yaxşı mübarizəli oyun getdi. Futbolçular bu tempə, dinamikaya öyrəşirsə, təqdirəlayiqdir. Düşünmürəm ki, avrokuboklar bizə müsbət və ya mənfi təsir edə bilər. İlk dəfə ölkəmizi avrokubokda təmsil edirik. Biz də başımızdan yuxarı tullanmağa cəhd etdik, amma alınmadı. Təzyiqə gəldikdə, 5 ildir mövsümün əvvəlində məni "göndərirlər". Şayiələr normaldır. Onu da hansısa insanlar yaradır. Şayiələrə fikir verib, işimizə yanaşsaq, özümüz-özümüzü geri salmış olacağıq. Tənqidi qəbul edirik. Biz də komanda olaraq, artığını etməyə çalışdıq. Futbolda hər şey istəklə bağlı deyil. Ümidverici odur ki, komandam o geridönüşü etməyi bacarır. Kollektiv bərkdir, onlara inanıram. Turlar keçdikcə daha da yaxşı “Araz-Naxçıvan” görəcəksiniz.

– Penalti epizodu haqda nə düşünürsünüz?
– Mən də planşetdən baxıram. Ucuz penaltini heç öz lehimizə də istəmərəm. Penalti qərarı səhv idi.

– Niyə mərhələ adlamağı başınızdan yuxarı tullanmaq kimi dəyərləndirirsiniz?
– Ona başqa prizmadan yanaşmaq olar. Siz fikirləşirsiniz ki, heyətimizə 4-5 oyunçu qatdıqca, mütləq qruplarda olacağıq? Avrokuboklar təcrübə tələb edir. Gözümüzün qabağında “Qarabağ” nümunəsi var. İllərdir addım-addım qruplara gəlib. İstəklə bağlı olan bir şey deyil. Komanda özü formalaşmalıdır ki, avrokuboklarda da ardını gətirsin. Biz də bilirdik ki, yeniyik. Elə nüanslar olur ki, tək meydançaya yox, hər şeyə təsir edir. Ona görə komanda olaraq, biz də çalışdıq. Alınmadısa, tək “Araz-Naxçıvan”ı nümunə kimi gsötərməyə ehtiyac yoxdur. Bizdən başqa komandaların da oyunları alınmadı.

– İqor Ribeyronun gedişindən sonra müdafiədə sıxıntı çəkirsiniz?
– “Barselona”nın baş məşqçisindən Messinin çatışmadığını soruşsalar, o da sual olaraq qalacaq. İqor mövzusu qapanıb. Sərəncamımda olanlar, inanıram ki, onun yerini layiqli şəkildə dolduracaqlar.