Misli Premyer Liqasının II turunun “Şamaxı” – “Sabah” oyunundan (1:2) sonra meydan sahibi komandanın baş məşqçisi Ayxan Abbasov jurnalistlərin suallarını cavablandırıb
Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.
– Çətin oyun olacağını bilirdik. Bizdən daha yaxşı formadadırlar. Bizim hələ 2-ci rəsmi oyunumuz idi. Matça pis başladıq. İlk 10-15 dəqiqəni çıxsaq, qalan müddətdə komandamın oyunundan razıyam. Epizodlarımız oldu, dəyərləndirə bilmədik. Bərabərlik qolundan sonra da şansımızdan istifadə edə bilmədik. “Sabah”a qarşı inamlı oynadıq. Bu gün azı 1 xal qazanmaq istəyirdik. Buna layiq idik. Çempionat uzun marafondur. Gələcək oyuna baxacağıq. Qarşıda “Sumqayıt” səfəri var. Bu matça tam köklənməliyik.
– İlk qolda qapıçınız Rikardonun topa çıxmamasını qınayırsınız?
– Çətin top idi. Böyük bir epizod deyildi. Sadəcə, ani diqqətsizlik qola səbəb oldu. Bəlkə də bu qol məğlubiyyətə səbəb oldu.
– “Sabah” neçə il idi, burda qələbə qazanmırdı…
– Oyun şansı “Sabah”da idi. Biz standartdan fərqlənə bilmirik, onlar fərqlənir. Rossi iki epizodu dəyərləndirə bilmədi. Qarşılıqlı epizodlar oldu. Futbolçularımızın zəif çıxış etdiyini demək olmaz. Futbol şansı “Sabah”ın tərəfində idi.
– Edqar Ədilxanov əvvəlki səviyyəsində deyil. Ona nə olub?
– Edqar ötən oyunda əsas heyətdə olmadığı üçün çox suallar olmuşdu. Həmişə deyirəm, oyunçuların keçid dövrü var. Hər oyunçu təzyiqlərlə bacarmalıdır. Edqardan tam razı deyildik. Bu gün nələrsə etmək istəyirdi. İnşallah, o da formaya düşəcək. Onunla təkbətək danışdıq. Cavanlara dəstək lazımdır.
– İkinci hissədə Rossiyə qarşı çəkmə var idi. Epizoda baxdınız?
– Bütün foullar biz tərəfə idi. Zarafatca dedim ki, əvvəl səfər oyunlarında top göydə olanda oyunu dayandırırdılar. 2 oyundur, hakimlərin simpatiyası rəqib tərəfdədir. Sanki onların adlarına görədir. Bu gün elə bil səfərdə oynayırdıq. Bir tərəfdən yaxşıdır, hakimlər bizi öyrədir ki, daha möhkəm olaq.
– Ötən il Azərbaycan Kubokunda “Neftçi” – “Sabah” oyununda Rauf Allahverdiyev səhv etmişdi və hakimlikdən uzaqlaşdırıldı. Sizcə, indi digər hakimlər üzərində də təzyiq var?
– Onlardan soruşmaq lazımdır. Hakimlərimiz zəif deyil. Onlara beynəlxalq təyinatlar da gəlir. İstəyirik ki, hər kiçik foula görə oyun dayanmasın. Rossinin epizodunda qayda pozuntusu var idi, amma hakim dayandırmadı. Heç epizoddan sonra da rəqibə vərəqə vermədi. Onsuz da hakimlərə nəsə sübut etmək olmur. Nə etsək də, səhvik. Hakimlərin üstünə getməyək.
– Yayda düşərgənizdə Raul Hacıyev baxışda olub. Gürcüstan vətəndaşı idi, amma sonra qaldı. AFFA bu məsələdə sizə nəsə köməklik edir?
– Bəzi məsələlər var. Proseslər üçün vaxt lazımdır. Raufla bağlı nəsə müraciətimiz olmayıb.