Misli Premyer Liqasının II turunun “Şamaxı” – “Sabah” oyunundan (1:2) sonra qonaq komandanın baş məşqçisi Valdas Dambrauskas jurnalistlərin suallarını cavablandırıb.
Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.
– “Sabah” ailəsini, rəhbərliyini, uzaq səfərə gəlmiş azarkeşləri, oyunçularımı təbrik etmək istəyirəm. 4 ilə yaxındır, burada qalib gələ bilmirdik. Bu, mənimçün xoş oldu. Meydanda görmək istədiklərimizi gördük. Rəqib çox-çox çətin komandadır. Bura gələn bütün kollektivlər 100 faizini verməsələr, inadkar, yaxşı təşkil olunmuş rəqib görəcəklər və qələbə çətin olacaq. “Şamaxı” yaxşı müdafiə olunur. Oyuna yaxşı başladıq. Həftə ərzində bunun üzərində çalışmışdıq. Lakin fərqli tip ötürmələrdən istifadə edə, daha çox cərimə meydançasında topa sahib ola bilərdik. Fasilədən sonra boşluqlar tapmaq çətin idi. Havanın da təsiri ola bilər. Rəqib möhtəşəm zərbə ilə fərqləndi və qoldan sonra verdiyimiz reaksiya çox xoşuma gəldi. Yeni, gümrah oyunçuları meydana buraxdıq. Hiss edirdik ki, böyük səhvlər etməsək, burdan qələbə ilə qayıdacağıq. İndi bunları unutmalı və növbəti matçlara köklənməliyik. Sabah məşqimiz var. Bütün komandalar müsbət motivasiya ilə yarışa başlayıb. Səfərdə qazanılan 3 xal məmnunedicidir.
– Avrokuboklardan sonra Premyer Liqada ilk oyuna çıxdınız. Çempionatımızın hansı özəlliyi diqqətinizi çəkdi?
– Heç vaxt avrokubok oyunundan sonra yerli çempionata köklənmək asan olmur. Futbolçuların necə reaksiya verəcəyi bilinmir. Belə hallarda əsas məqam intizamdır. Bu intizama sahib olsan, çox şey əldə edə bilərsən. Avropada 6 oyun keçirmişik və oyun ritminə alışmışıq. Konfrans Liqasına vidadan sonra 10 gün fasilə oldu və qismən ritmimizi itirdik. Azərbaycan çempionatını izləmişəm. Burda favorit yoxdur. Top komandalar – “Qarabağ”, “Neftçi”yə qarşı oynayanlar da meydana inamlı çıxır. Hər klubun öz spesifik oyun planı var. Bütün klublarla birlikdə böyüməliyik.
– Mikels və Noqeyranın mübahisə etdiyi epizodu necə şərh edərdiniz?
– Belə halları görməkdən məmun deyilik. Orada mübahisənin əsas səbəbi daha yaxşı oynamaq istəmələri idi. Artıq hər şey bitib və oyundan sora bir-biriləri ilə qucaqlaşdılar.
– Məqsədinizə çatmaq üçün daha neçə legionerə ehtiyacınız var?
– Oyunçularımın necə məşq etmələrini, yanaşmalarını izləyirəm. Heyəti seçəndə onların milliyətinə baxmıram. Kimin necə çalışdığına fikir verirəm.
– Legioner futbolçu transferi olmayacaq?
– Transferlə barədə düşünürük. Oyunçu gətirəndə onun pasportuna baxmırıq. Azərbaycanlı bir oyunçu olsa və bizim istədiyimiz mövqeyə uyğun gəlsə, onu komandaya götürərəm. Futbolçunu transfer xətrinə transfer etmirik. Heyətimizdən razıyam. 2 aydır burdayam. Düşünürəm ki, heyəti tamamilə tanımaq üçün kifayət qədər vaxt olmayıb.
– “Qarabağ” Azərbaycan çempionatında demək olar, ikinci heyətlə meydana çıxır. Sizcə, bu fonda çempionluq uğrunda mübarizə apara bilərsiniz?
– Bu barədə şərh verə bilmərəm. “Qarabağ”ın hansı heyətlə oynayacağı haqda danışmaq istəməzdim. Mənimçün əsas və ya ehtiyat heyət anlayışı olmayacaq. Çalışırıq ki, həmişə inkişaf edək. Mövsümün sonunda necə olacağını deyə bilmərəm. Bakıya qayıdıb, növbəti oyuna hazırlaşmağa başlayacağıq. Növbəti həftə “İmişli”yə qarşı önəmli oyun olacaq.