Misli Premyer Liqasının II turunun “İmişli” – “Neftçi” oyunundan (0:0) sonra meydan sahibi komandanın baş məşqçisi Jorje Kaşkilya jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.

– Gözlədiyimiz kimi çox çətin oyun oldu. “Neftçi” çempionluğa oynayan komandadır. Biz son oyundan dərsimizi almışdıq. Səhvlərimizdən nəticə çıxarıb, yaxşı məşq edib bu matça çıxmışdıq. Bilirdik ki, “Neftçi” meydana qələbə üçün çıxacaq. Biz istəyimizə çatdıq və xalımızı aldıq.

– Çexiya III Liqasında çalışmısınız. Həmin çempionatla Azərbaycan Premyer Liqasını müqayisə edə bilərsiniz?
– Müqayisə etmək mümkün deyil. Azərbaycan Premyer Liqası təbii ki, Çexiyanın III Liqasından üstündür.

– Bura gələndən sonra həmyerliniz Fernandu Santuşla görüşünüz olub?
– Bir yoxlama oyunumuza gəlmişdi. Orada görüşdük. Amma Azərbaycan futbolu ilə bağlı elə geniş söhbətimiz olmayıb.

– İlk 3 turda iddialı rəqiblərlə qarşılaşırsınız. Püşkdə bəxtinizin gətirmədiyini demək olar?
– Bilirdik ki, bizi 3 çətin oyun gözləyir. Bunu bilərək komandanı hazırlayırdıq. Gördüyünüz kimi, “İmişli” heç bir rəqibdən geri qalmadı. Hazırlığımız yaxşı keçib. “Sabah” sürətli futbol oynayan komandadır. Onlara qarşı həm fiziki, həm də psixoloji cəhətdən hazırlaşacağıq.

– Komandanızda ikili mübarizələrdə axsama hiss olunur. Bunu necə aradan qaldıracaqsınız?
– Komandamız fiziki cəhətdən yaxşı hazırlaşıb. Gənc oyunçularımız çoxdur. Belə hallar müşahidə oluna bilər. Amma bu, o demək deyil ki, bizim futbolçular fiziki cəhətdənn zəifdir. Çatışmazlıqların üzərində işləyirik.