UEFA Çempionlar Liqasının pley-off mərhələsinin “Ferentsvaroş” (Macarıstan) – “Qarabağ” oyunundan (1:3) sonra Azərbaycan təmsilçisinin baş məşqçisi Qurban Qurbanov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.

– Futbolçularımı təbrik edirəm. Gərgin oyun olmasına baxmayaraq, bu qədər azarkeş önündə sona kimi dözdülər, qalib gəlmək üçün ən yaxşısını etməyə çalışdılar. Azarkeşlərimizə təşəkkür edirəm, burada bizi tək qoymadılar. Eləcə də rəqib komandanın fanatlarına təşəkkür edirəm, stadionda yaxşı atmosfer var idi. Hesab bizi aldatmamalıdır. Bəli, üstünlüyümüz var, amma Bakıdakı oyunda daha ciddi, diqqətli olmalıyıq. Rəqibin elə oyun üslubu var ki, heç nədən qol vurmağı bacarır. Hər bir halda, cavab oyununda daha ciddi olacağıq və şansımızdan maksimum istifadə etməyə çalışacağıq.

– Buraxdığınız qol sizi həvəsdən saldı?
– Səfərdə qol buraxanda komandada həyəcan bir az çoxalır. Qoldan sonra 10-15 dəqiqə üzərimizdə təzyiq artdı. Lakin getdikcə oyunu ələ aldıq və 2-ci hissədə riskə getdik. İlk yarıda qol vurmaq istəyirdik, 2-ci hissədə isə daha çox qol üçün həvəsli idik. Qol buraxmaq istəməzdik. Amma futbolçulardan tələbim maksimum çox qol vurmaqdır.

– Özünüzü Liqa mərhələsində hiss edirsiniz?
– Qətiyyən yox. Qarşımızda çox ciddi, istəkli, məğlub olmağı xoşlamayan baş məşqçi və komanda var. Yenə deyirəm ki, rəqibin istənilən standart vəziyyətlərdə, hücumda qol vurmaq bacarığı var. Bakıdakı oyunda daha ciddi olamlıyıq, arxayınlaşmalı deyilik. Hər buraxılan qol komandada inamsızlıq yaradır. Bakıda daha ciddi olmalıyıq. Bugünkü qələbəni bayram etməli deyilik.