Premyer Liqasının I turunun “Sumqayıt” – “Kəpəz” oyunundan (3:0) sonra meydan sahibi komandanın baş məşqçisi Saşa İliç jurnalistlərin suallarını cavablandırıb.
Prosport.Az xəbər verir ki, serb mütəxəssis əvvəlcə görüşlə bağlı fikirlərini bildirib.
– İlk ev oyununda qələbə qazandığımız üçün sevincliyik. İlk hissədə yaxşı oynadıq, amma fasilədən sonra problemlər oldu.
– Hücum futbolu oynadınız. Bu fəlsəfəni davam etdirəcəksiniz?
– Hər oyunda belə olmasını istərdim. Amma reallıq var. “Qarabağ”, “Neftçi” kimi komandalara qarşı belə oynaya bilmərik. Belə oynasaq, bizi cəzalandırarlar. Bu matçda 2-ci hissədə problemlər yaşadıq. Bunları nəzərə alıb, məşqlərdə aradan qaldırmağa çalışacağıq.
– 2-ci hissədə rahatlıq yaxşı oyuna əngəl oldu, ya fiziki cəhətdən çatdırmadınız?
– Fiziki problem olduğuna inanmıram. Çünki bir neçə əvəzetmə etdik və yeni oyunçular qoşuldu. Fərdi səhvlər var idi. Bəzi oyunçular səhv etdi. 3:0 olanda daha rahat, sadə oynamalısan. Bəzi oyunçular bunu dərk etmədi. Bəziləri fərdi mübarizələrdə səhvlər etdi, 2 sarı vərəqə aldıq.
– Sonradan meydana daxil olan oyunçuların yaxşı qoşulmamasının təsiri oldu?
– Problem səhvlərdə idi. Bəzi oyunçulara vaxt lazımdır. Futbolçuları yoxlamaq üçün əvəzetmələr edirik. Əsas problem sadə oynamamağımız idi. Oyunçular riskli duellərə girdi.
– Növbəti tur “Qarabağ”la oynayacaqsınız. Onlar da sizdən öncə Macarıstanda “Ferensvaroş”la qarşılaşacaq. Bu sizin üçün üstünlükdür?
– “Qarabağ” Azərbaycanın ən güclü komandasıdır. Onların oyunlarını daim izləmişəm. “Ferensvaroş”la oyun onlar üçün çətin olacaq. Amma bunun bizə hansı üstünlüyü qazandıracağını bilmirəm. Oyuna taktiki fikir verməliyik. Bugünkü kimi səhvlər etsək, bizim üçün yaxşı bitməyəcək.
– Burada olduğunuz müddətdə azərbaycanlı futbolçuların mentalitetini dəyişə bilmisiniz? Ayxan Süleymanlı hücumun gedişində arxaya oynadı, 2 dəfə səhv etdi və sonra onu əvəzlədiniz…
– Ayxanı bəyənirəm. Azərbaycanın U-21 yığmasının üzvüdür. 2-ci hissədə bəzi səhvlər etdi. Onunla söhbətim oldu. Gələcəkdə çox oynamaq istəyirsə, bu səhvləri etməməlidir.