Qışda "Qarabağ"dan transfer olunmuş futbolçu Juninyo Braziliyanın "Flamenqo" klubunu tərk etmək istəyir.

Prosport.Az "Mix Vale" nəşrinə istinadən xəbər verir ki, 29 yaşlı hücumçu ona az şans verilməsindən narazılığını bildirib.

Ön xətdəki mövqeyini Pedro, Bruno Enrike və Everton Sebolinya kimi oyunçulara təslim edən Juninyo daha əvvəl Səudiyyə Ərəbistanının "Ər-Riyad" və "Nacran" klublarının da təklifini rədd edib.

"Flamenqo" Samuel Lino və Qonsalo Plata ilə gücləndikdən sonra onun mövqeyi xeyli daralıb.

Son oyunlarda heyətə salınmaması təcrübəli forvardı təklifləri dəyərləndirmək qənaətinə gətirib. Səudiyyə Ərəbistanına gedişi həm braziliyalı futbolçunun özü, həm də klubu üçün ən münasib qərar kimi dəyərləndirilir. "Flamenqo" ondan azad olmaqla, yerinə yeni transfer etmək niyyətindədir. Oyunçunun özü isə yenidən özünü göstərmək məqsədi güdür.

Qeyd edək ki, Juninyo "Qarabağ"dan "Flamenqo"ya 5 milyon avroya keçib. O, 2024-2025-ci illər mövsümündə həm "Qarabağ"ın, həm də Misli Premyer Liqasının bombardiri olub.