UEFA Konfrans Liqasının III təsnifat mərhələsinin “Sabah” – “Levski” (Bolqarıstan) oyunundan (0:2) sonra meydan sahibi komandanın baş məşqçisi Valdas Dambrauskas jurnalistlərin suallarını cavablandırıb.
Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.
– “Levski”ni pley-offa yüksəlməsi münasibətilə təbrik edirəm. Hazırda çox şey deyə bilmirəm. Çünki iki oyunda qol vura bilmirsənsə, rəqib mərhələ adlamağa layiqdir. Azarkeşlərimizə təşəkkür edirəm. Həqiqətən onların dəstəyini hiss etdik, gözəl atmosfer yaratmışdılar. Taktiki baxımdan nələrsə demək, təhlil etmək çətindir. Çox məyusuq. Bunu unutmalıyıq. Sabahdan çempionat haqda düşünməliyik. Hələ də inkişaf etdirməli olduğumuz çox şey var.
– Bolqarıstandakı oyundan fərqli olaraq burada qorxaq “Sabah” gördük. Səbəb nə idi?
– Nə üçün belə dediyinizi başa düşmürəm. Qorxaq deməyiniz oyunçularımıza hörmətsizlikdir. Sofiyada intizamlı oynadıq. Heç-heçəyə yaxşı nəticə demirəm, amma son saniyə bizi bərabərlikdən ayırdı. İnkişaf etdirməli şeylər var. Bugünkü matçın birinci hissəsinə baxsanız, xətlərarası əlaqənin necə olduğunu görərsiniz. Bu gün risk etməli idik. İlk hissədə bir səhvimiz oldu və rəqib qol vurdu. Bundan sonra daha çox risklər aldıq. Üçüncü zonaya gələrkən daha dəqiq ötürmələrimiz olmurdu. Bu da boşluqlar tapmağımıza çətinlik yaradırdı. Bəzən son ötürmələrdə problemlər yaşayırdıq. Bunları inkişaf etməliyik. Çempionata köklənməliyik. Bir arzumuz var, yenidən avrokuboklara vəsiqə qazanmaq.
– Arenada bu gün 6000-dən çox azarkeş var idi. Lakin oyunun sonlarında artıq arenanı tərk edirdilər. “Sabah”ın belə oyunu fanatlara hörmətsizlik deyildi?
– Azarkeşlərə nəzarət etmək əlimizdə deyil. Futbolda hər şey nəticədən asılıdır. Nəticə yaxşı olsaydı, bizi alqışlayacaqdılar. Fanatları səbirli olmağa çağırıram. Çox məyusuq. Hesabı bərabərləşdirib, oyuna intriqa qata bilərdik. Azarkeş mədəniyyətini bir gündə yaratmaq mümkün deyil. Nəticələrimiz yaxşılaşdıqca, onlar da xoşbəxt olacaq.
– Şafranko və Sekidika çıxdıqdan sonra hücumun effekti azaldı. Dəyişiklik etməkdə yanıldığınızı düşünmürsünüz?
– Yanlış xatırlamıramsa, 70-ci dəqiqədən sonra bunu etdik. Hər dəyişikliyin arxasında xoş niyyət var. İstəyirik ki, meydana daxil olan oyunçu aktivliyi artırsın. Amma əvəzetmə elədir ki, qol vursalar, deyəcəkdilər, oyunun gedişatını dəyişdiniz. Amma bu gün alınmadı. Kahim Perrisi meydana saldıq, Anatoli Nuriyev, Xəyal Əliyevlə kreativliyi, sürəti artırmaq istədik. Hətta mərkəz müdafiəçimizi də oyuna daxil etdik ki, standart vəziyyətlərdə nələrsə edə bilək.
– Müdafiədə boşluqlar çoxdur. Bunları Avropa yarışlarında gördük. “Sabah” vaxtında lazımi sayda keyfiyyətli futbolçular transfer etmədiyi üçün bu gün “Levski” qarşısında aciz göründü?
– Bu qədər böyük problemi harada gördüyünüzü bilmirəm. İlk hissədə rəqibin qapımıza bir zərbəsi oldu. İkinci hissədə rəqib çox arxaya çəkildi və boşluqlar vermədi. Oyuna nəzarət edən biz idik. Rəqib əks-hücumlardan fərqlənmək istəyirdi. Sadəcə bir fürsətləri oldu və vurdular. Bizim də şanslarımız var idi, amma yararlana bilmədik. Unutmayaq ki, rəqibimiz Bolqarıstan 2-cisi olub. Transfer dəyərləri bizdən artıqdır. Amma biz Sofiyada da əlimizdən gələni etdik. Sadəcə 10 saniyə bizi yaxşı nəticədən ayırdı. Bunun da ikinci oyuna təsiri oldu. Uşaqlar əllərindən gələni etdilər. Həll yolu o deyil ki, indi heyəti dəyişək. Çalışıram ki, daha çox və ağıllı işləyək, komandanı inkişaf etdirək.
– Çempionatda məqsədiniz nə olacaq?
– Məqsədimiz maksimum çalışmaqdır. Əlimizdən gələni edəcəyik ki, hər oyunda qələbə qazanaq.