UEFA Konfrans Liqasının III təsnifat mərhələsinin “Sabah” – “Levski” oyunundan (0:2) sonra qonaq komandanın baş məşqçisi Xulio Velaskes jurnalistlərin suallarını cavablandırıb.

Prosport.Az xəbər verir ki, mütəxəssis media nümayəndələri ilə görüşdə bunları söyləyib.

– Nəticəyə görə özümü xoşbəxt hiss edirəm. Komandam tapşırıqları yerinə yetirdi. İlk oyunda qazandığımız nəticəni qorumağı yox, qələbəni düşünürdük. Rəqib çətin anlar yaşatdı. Fərdi olaraq keyfiyyətli oyunçuları var. “Sabah” bəzi anlarda bizə çətinlik yaratdı.

– Komanda Bolqarıstandakı oyundan fərqli olaraq bu gün daha rahat görünürdü. Dəyişən nə idi?
– Heyətdə yalnız bir oyunçu dəyişmişdi. Yalnız Rupanov startda idi. Nəyə görə rahat idik? Çünki futbolçular qarşılarına qoyulan tapşırıqları bilirdilər. Onlar fədakarlıq etdilər.

– Komandanız müdafiədə etibarlı oynadı…
– Həm hücumda, həm müdafiədə yaxşı oynadıq. Əsas olan xətlərarası əlaqəni yaxşı qurmaq idi. Rəqibdən asılı olaraq dəyişiklik edə bilərik. Bu, qarşımızda olan tələbdən asılıdır.

– “Levski” ilə Avropada ilk mövsümünüzdür. Hədəfiniz nədir?
– Mentalitetim ancaq oyundan oyuna getməkdir. Yalnız qarşıdakı oyunlara köklənirəm.

– “Sabah”ın heyətində fərqləndirdiyiniz xüsusi oyunçu var?
– “Sabah”ın yaxşı baş məşqçisi var. Fərdi olaraq danışmağı xoşlamıram. Akim Zedadka İspaniyada mənim oyunçum olub. Valdas Dambrauskas yaxşı komanda yaradıb. Əminəm ki, klubun transfer bazarında öz dəyəri var.