"Qarabağ"ın sabiq futbolçusu Julio Homeo (Júlio Romão) keçmiş komandasına qarşı oynamayacaq.

Prosport.Az-ın xəbərinə görə, Macarıstan çempionu "Ferensvaroş"da oynayan braziliyalı dayaq yarımmüdafiəçisi zədədən əziyyət çəkir.

O, "Pakş"la oyun öncəsi məşqdə topuq nahiyəsi sındığından və əməliyyat olunduğundan, ötən mövsümün son 3 matçı və cari mövsümkü oyunları qaçırıb. 27 yaşlı futbolçu artıq məşqlərə qoşulsa da, onun hələ oynaması mümkünsüzdür. Bu səbəbdən də sambaçı sabiq komandasına qarşı avqustun 19-da UEFA Çempionlar Liqasının pley-off mərhələsinin Budapeştdəki ilk matçını buraxacaq. Onun bundan 1 həftə sonra Bakıda keçiriləcək matçı da buraxacağı istisna deyil.

Qeyd edək ki, Julio Homeo sonuncu dəfə ötən mövsümün XXX turu çərçivəsində mayın 3-də keçirilmiş "Puşkaş"la çempionluğun taleyini həll edən matçda (1:1) 90 dəqiqə oynayıb.