"Burada olduğum üçün çox şadam".

Prosport.Az xəbər verir ki, bunu “Qəbələ”nin yeni transferi Eduardo Kunde deyib.

Braziliyalı futbolçu klubun rəsmi saytına açıqlamasında komandaya uyğunlaşma prosesində olduğunu bildirib: “İlkin təssüratım çox yaxşıdır. Həm komanda yoldaşlarım, həm məşqçilər heyəti, həm də klubun işçiləri məni isti qarşıladılar. Dünən yoxlama oyununda az da olsa, şans qazandım. Komandaya adaptasiya olmağa çalışıram. Hələ təlim-məşq toplanışı başa çatmadığı üçün uyğunlaşmaq baxımından vaxtımın olduğunu düşünürəm. Ümid edirəm ki, tezliklə çempionatda oynamağa hazır olacağam”.

O, “Qəbələ”nin təklifini qəbul etməsi barədə isə bunları deyib: “Qəbələ”dən təklif alanda klub və ölkənizlə bağlı araşdırma apardım, məlumatlar topladım. Hər kəs həm komanda, həm də Azərbaycan barədə yaxşı sözlər dedi. Qəbələ şəhərinin gözəl təbiətə malik olduğunu, klubun isə Azərbaycan futbolunda tarix yazdığını öyrəndim. Bu səbəblər təklifi qəbul etməyimdə vacib rol oynadı”.