“Araz-Naxçıvan” UEFA Konfrans Liqasının III təsnifat mərhələsinin ilk oyununda Bakıda “Omoniya”ya 4 cavabsız qolla uduzub .
Prosport.Az xəbər verir ki, komandanın baş məşqçisi Elmar Baxşıyev matçdan sonra keçirilən mətbuat konfransında jurnalistlərin suallarını cavablandırıb:
"Ağır oyun alındı. Düşünürdük ki, komanda olaraq müqavimət göstərə bilərik. Bilirdik ki, rəqib təcrübəlidir. Zəif oynadıq, qəbul etmək lazımdır. Bu tip oyunlarda bu sayda səhv nəticəsiz qalmır. Komanda olaraq, bəlkə də düzgün yanaşıb, davam etmək lazımdır".
- Bu nəticəni nəyə bağlayırsınız?
- Cavabın üstündə İqor Ribeyrodan yenə soruşacaqsınız. O, "Neftçi"nin futbolçusudur. Bizim üçün Ribeyro məsələsi bitib. Zəif oynadıq. Sırf müdafiəçilər yox, müdafiə planında axsayırdıq.
- "Omoniya"nın hücum gücünün keyfiyyətli olmasına baxmayaraq, "Araz-Naxçıvan" açıq futbol oynadı. Bir az müdafiədən oynasaydınız, nəticə fərqli olardı?
- Futbolda bir az olmur. Futbolda yanaşma var. İlk gündən bu komandanı daha çox hücumda görmək istəyirəm. Bu oyuna hazırlıq zamanı da ancaq hücum edəcəyik deyildi. Komandanı iki fazada hazırlamışdıq. Amma alınmadı.
- Fasilədə oyunçulara nə dediniz?
- Bəzən onu da qəbul etmək lazımdır ki, istəyirsən, amma alındıra bilmirsən. Bu, elə oyunlardan biri idi ki, nə dəyişiklik etsək də, birinci hissə ikinci hissədən seçilmədi. Komanda olaraq uduzmuşuq. Bunu qəbul etmək lazımdır.
- Bolinin zədəsi nə dərəcədə ciddidir?
- Zədəsi o qədər də ciddi deyil.
- Patrik Andrade və Felipe Santos sanki daha çox fərdi oyuna üstünlük verdilər...
- Yaxşı sual verdiniz. Müasir futbolda daha çox fərdi keyfiyyətlərə önəm verirlər. Onu futbolçuların əlindən ala bilmərəm. Özgüvəni varsa, rəqibi keçmək də istəyəcək. Sırf Felipe və Andradenin individual hərəkətləri də nəticəyə təsir etmədi.
- "Omoniya"dan qorxdunuz deyə belə oldu?
- Qorxu yox idi. Bilirdik ki, qarşımızdakı rəqib təcrübəlidir. Bəzən hazırlaşırsan, amma başqa sürprizlər olur. Komanda olaraq ardıcıl qollar buraxandan sonra oyuna qayıtmaqda çətinlik çəkdik. Bu da futbolçularımın zəif çıxışının nəticəsidir? Yox. Sadəcə bəzən istəyirsən, alınmır. Normal qəbul etmək lazımdır.
- Demək olar ki, bu mövsüm avrokuboklar sizin üçün bitdi. Komandanı toparlamaq nə dərəcədə çətin olacaq?
- Biz işimizi sosial şəbəkə üzərində qurmuruq. Hər bir insan sərbəstdir, öz fikrini bildirir. Komanda olaraq sakitləşib, səfər oyununa hazırlaşacağıq.