Azərbaycanlı kikboksçu Eduard Məmmədovun tələbəsi Fərid Ağamoğlanov Polşada keçirilən III Avropa Oyunlarında qızıl medal qazanıb.

Bu münasibətlə Prosport.Az-ın Polşaya ezam olunmuş əməkdaşı Eduard Məmmədovdan müsahibə götürüb.

– Bu gün tələbəniz çempion oldu. Əvvəldən gözlənilirdi ki, Fərid çempion olacaq. Təəssüratlarınız necədir?
– Bildiyiniz kimi, ilk dəfə olaraq kikboksinq Avropa oyunlarına daxil olub. Fərid bu il Türkiyədə Dünya Kubokunun da sahibi oldu. Güclü rəqibləri məğlub etdi. Burada 1-ci döyüş slovakiyalı, 2-ci Norveç və final döyüşü italiyalı idmançıya qarşı oldu. Biz hər bir idmançıya hörmətlə yanaşırıq. Hər bir idmançının texnika və taktikasını döyüşdən qabaq izləyirik. Amma yeganə idmançı idi ki, italiyalı kikboksçuya qarşı xüsusi hazırlaşmışdıq. Biz həmin idmançı ilə yarımfinalda və ya finalda üzləşəcəyimizi bilmirdik. Amma şükürlər olsun ki, finalda görüşdük. Final oyunları həmişə maraqlı olur. Tam əmin idim ki, Fərid ondan güclü olacaq. Döyüşlərdə artıra-artıra finala gəldik. Bildiyiniz kimi, finalda 3 xaldan yuxarı vermirlər. Fərid 3 xal üstünlüklə axıra qədər mübarizəni aparıb qalib gəlib çempion oldu. Bu, Azərbaycan xalqının qələbəsidir.

– Sizin üçün həm də ikiqat bayramdır...
– Həqiqətən həm Fərid ilk dəfə olaraq Avropa Oyunlarının qalibi oldu, həm də bu gün peşə bayramımızdır. Bildiyiniz kimi, Daxili İşlər Nazirliyi İdman-təlim şöbəsinin rəisi, polis polkovnik-leytenantıyam. Fərid də DİN İdman Cəmiyyətinin yetirməsidir və bu yarışda qalib gəldi. Mən çox sevinirəm ki, cənab nazirimiz Vilayət Eyvazov da məni fəxri fərmanla təltif edib. Biz də fəxr edirik ki, Azərbaycan polisində xidmət edirik. Fəxr edirik ki, bu günləri qızıl medalla Vətənə qayıdırıq. Bu gün azarkeşlik çox yüksək səviyyədə oldu. Öz meydanımızda çıxış edən kimi özümüzü hiss etdik. Yarışı gəlib Mışlenitse şəhərindən işıqlandıran media işçilərinə və Gənclər və İdman Nazirliyinə də təşəkkür edirəm.

– Daha bir tələbəniz 23-28 oktyabrda Səudiyyə Ərəbistanının paytaxtı Ər-Riyadda keçiriləcək Ümumdünya Kombat Oyunlarında çıxış edəcək. Ondan da eyni uğuru gözləyək?
– Bəli, Amin Quliyev, bildiyiniz kimi, gənc idmançıdır. Baxmayaraq ki, Amin WAKO yarışlarında üçqat Avropa çempionu, ikiqat dünya çempionudur. Amin 17 yaşında böyüklər arasında Avropa çempionu olub. Hazırda 18 yaşı olan Amin Səudiyyə Ərəbistanında yarışa vəsiqə qazanan yeganə idmançımızdır. Orada ən güclü "8-lik" olacaq. Rəqibləri son Avropa çempionatının gümüş və 2 bürünc medalçısı, 2 rəqibi Qazaxıstan və Özbəkistandan və 2 nəfər də Amerika qitəsindən olan ölkə idmançıları olacaq. Orada zəif idmançı olmayacaq. Amil yaşca kiçik olsa da inanıram ki, o yarışda qalib gəlib çempion olacaq.

– 17-26 noyabr tarixərində həm də Portuqaliyanın Albufeyra şəhərində böyüklər və masterlər arasında dünya çempionatı olacaq.  Orada özünüzün yenidən idmançı kimi iştirakınız nəzərdə tutulub?
– Özüm yaxşı formadayam. Bu il orada yenə 2 növdə iştirak etmək istəyirəm. Düzdür, çətin olacaq. Amma həm "kik layt"da, həm də "layt"da döyüşüb yenidən dünya çempionu olmaq istəyirəm.

Səbuhi Musa