Noyabrın 6-da Gənclər və İdman Nazirliyi, Azərbaycan Atıcılıq Federasiyasının birgə təşkilatçılığı ilə dövlət qurumlarının əməkdaşları arasında güllə atıcılığı yarışı keçirilib. 

Prosport.Az xəbər verir ki, Bakı Atıcılıq Mərkəzində təşkil olunan yarışda 36 dövlət qurumundan 114 əməkdaş iştirak edib.

Yekun nəticələrə görə, qadınlar arasında Daxili İşlər Nazirliyinin (DİN) əməkdaşı Nərgiz Nəsirova fəxri kürsünün ən yüksək pilləsinə qalxıb. Aynur Məmmədova (Fövqəladə Hallar Nazirliyi) və Nigar İsmayılova (DİN) növbəti pillələrdə yer alıb. Kişilər arasında İlham Səfərov (DİN) 1-ci olub. Ayaz Kərimov (Azərbaycan Hava Yolları) yarışı 2-ci, Zülfüqar Babayev (DİN) isə 3-cü yerdə başa vurub.

Qeyd edək ki, 45 yaşlı Aynur Məmmədova parataekvondo millimizin sabiq üzvüdür. O, ikiqat dünya və dördqat Avropa çempionudur. Tokio Paralimpiya Oyunlarına vəsiqə qazansa da, COVID-19 testi pozitiv çıxdığından, yarışa bilməyib. O vaxtdan bəri millinin baş məşqçisi Fərid Tağızadə ilə arasında yaranan mübahisəyə görə yığmadan kənar qalan Məmmədova gücünü atıcılıqda sınayır.