Taekvondo üzrə gənclərdən ibarət milli komandanın baş məşqçi postuna yeni təyinat olub.

Prosport.Az-ın əldə etdiyi xəbərə görə, yeniyetmələrdən ibarət millinin hazırkı baş məşqçisi Rəşad Məmmədov bu posta təyin edilib. O, 7-9 noyabrda Albaniyanın paytaxtı Tiranada keçiriləcək yeniyetmələrin Avropa çempionatından sonra gənclərdən ibarət komandanı çalışdırmağa başlayacaq. Bu səbəbdən də federasiya hələ onun təyinatını rəsmi şəkildə açıqlamayıb.

Onun köməkçiləri isə taekvondo millimizin sabiq üzvləri – Ayxan Tağızadə ilə Fəridə Əzizova təyin olunub.

Qeyd edək ki, Rəşad Məmmədovadək gənclərdən ibarət milli komandanın baş məşqçisi kişilərdən ibarət əsas millini də çalışdıran Məmməd Abdullayev idi.

Yeri gəlmişkən, böyüklərdən ibarət qadınlar millisində cənubi koreyalı Son Mi Parkla yolların ayrılmasından sonra baş məşqçi postu hələ də boş qalsa da, məşqçilər korpusunda yeni təyinat baş tutub. Bu, 17 illik məşqçilik təcrübəsinə malik Günay Zeynalovadır. Onun yetirmələri arasında yeniyetmələr və gənclər yaş kateqoriyasında dünya və Avropa çempionatının mükafatçısı adını qazanmış idmançılar var.

Yeniyetmələrdən ibarət milli komandanın məşqçilər korpusunda da yeni təyinat olub. Belə ki, Cəlil Abdullayev yeniyetmələrdən ibarət yığma komandaya məşqçi təyin edilib.