"Elşad Şahbazov son anda Avropa Oyunlarına vəsiqə qazanıb".

Bunu Prosport.Az-a açıqlamasında kikboksçu Elşad Şahbazovun şəxsi məşqçisi Fuad Zeynalov deyib.

Məlum olduğu kimi, dünən Polşada keçiriləcək III Avropa Oyunlarında iştirak edəcək idmançıların sayı açıqlanıb. 86 idmançı həmin yarışda Azərbaycan adından çıxış edəcək ki, bunların arasında 2 kikboksçu da var.

Məsələ burasındadır ki, ötən ilin noyabrında Türkiyənin Antalya şəhərində keçirilmiş Avropa çempionatı vasitəsilə Avropa Oyunlarına vəsiqə qazanan yeganə idmançı dünya çempionu Eduard Məmmədovun tələbəsi Fərid Ağamoğlanov idi. Son Avropa 3-cüsü olan Ağamoğlanov kikboksinqin "Full Contact" növünün 63,5 kq çəki dərəcəsində Azərbaycanı mötəbər yarışda təmsil etmək hüququ əldə edib.

Bəs Elşad Şahbazov Avropa Oyunlarına necə vəsiqə qazanıb? Bu suala onun şəxsi məşqçisi, Dövlət Sərhəd Xidmətinin mayoru Fuad Zeynalov aydınlıq gətirib: "Bəli, Avropa çempionatında Elşad öz çəkisində – 75 kq-da çıxış etmirdi deyə zəif nəticə göstərdi və "8-liy"ə düşmədi. Ancaq bizə son anda məlumat gəldi ki, onun məğlub olduğu Avropa 3-cüsü, İspaniyanı təmsil edən Hacı Məhəmməd Həmdi zədələnib və Avropa Oyunlarında iştirak edə bilməyəcək. Bu səbəbdən WAKO bizim idmançıya yaşıl işıq yandırdı. Bu bir bəxt məsələsidir. Mən özüm də şəxsi məşqçi kimi Avropa Oyunlarında iştirak etmək üçün artıq sənədləşmə işlərinə başlamışam. Tələbəm Avropa Oyunlarında kikboksinqin "Full Contact" növünün 86 kq çəki dərəcəsində yarışacaq".

Qeyd edək ki, Avropa çempionatında 75 kq çəki dərəcəsində Kikboksinq Federasiyasının vitse-prezidenti Ramal Aslanov iştirak edib. Lakin o, "8-liy"ə düşə bilmədiyindən, Avropa Oyunlarına lisenziya qazana bilməyib.

Səbuhi Musa