"Hesab edirəm ki, mövsüm uğurlu keçdi. "Birbaşa Bakı" komandası yenə çempion oldu. Onları bu münasibətlə təbrik edirəm. Gərgin mövsüm alındı. Finalda gərgin mübarizə keçdi. "Aznur" komandası debütant olsa da, finaladək irəlilədi. Hesab edirəm ki, "Aznur", həm də III yer tutan "Real Bakı" komandaları minifutbol üzrə Azərbaycan çempionatına damğa vurdu. Əminik ki, yeni komandaların peyda olması minifutbolumuzun inkişafına gətirib çıxaracaq".

Prosport.Az-ın xəbərinə görə, bunu jurnalistlərə müsahibəsində Azərbaycan Minifutbol Federasiyasının prezidenti Orxan Məmmədov bildirib.

O bildirib ki, minifutbol üzrə milli komandamızın gələn ay əsas məqsədi 2-ci dəfə Avropa çempionluğunu qazanmaq olacaq: "Komandamız Avropa çempionatında favoritlərdən biridir. Son Avropa çempionluğumuzu və dünya çempionatında 4-cü yer tutduğumuzu nəzərə alsaq, bu dəfə də məqsədimiz qızıl medalları qazanmaq və titulumuzu qorumaqdır. Bildiyiniz kimi, Monteneqroda keçirilən Millət Liqasının finalında son dünya çempionu Rumıniyaya qalib gəldik. Bu da onu göstərir ki, iyunun 1-də Bosniya və Herseqovinada keçiriləcək Avropa çempionatına millimiz tam hazırdır. Bir neçə gündən sonra ora yollanacaq tam heyət elan olunacaq".

"Zirə" futbol klubunda Müşahidə Şurasının da sədri olan Orxan Məmmədov saytımıza müsahibəsində qadın liqası yaratmaq istədiklərini də dilə gətirib: "Məqsədimiz minifutbolda daha çox kütləviliyi təmin etməkdir. Bunun üçün regionları da yaddan çıxarmamalıyıq. Bildiyiniz kimi, minifutbol ölkəmizin hər yerində oynanılır. Nəinki regionlarda, həm də qadınlar arasında minifutbol liqası yaratmağı düşünürük. Çempionatda komanda sayında dəyişiklik olmayacaq. Ancaq yeni sponsorların, yeni oyunçuların çempionata cəlb olunması bizim üçün 1 nömrəli məqsəddir. Komandaların peşəkarlığının artırılması da əsas məqsədlərimizdən biridir".

Səbuhi Musa