"Uşanqi Kokaurinin Bakıda keçirilmiş "Böyük Dəbilqə" yarışından adının çıxarılması baş məşqçinin qərarıdır". 

Bunu Prosport.Az saytına açıqlamasında Azərbaycan Cüdo Federasiyasının baş katibi Rəşad Rəsullu deyib.

+100 kq çəki dərəcəsində Uşanqi Kokauri, Camal Həmzətxanov və Kənan Nəsibov 16-18 fevralda Bakıda keçirilmiş yarışda Azərbaycanı təmsil etməli olsa da, gürcü legioneri görmədik. Bəs dünya və Avropa mükafatçısı olan Kokaurinin doğma divarlar arasında keçirilən yarışda iştirak etməməsinin səbəbi nə idi?

"Səbəb odur ki, hazırda o, fiziki formasında deyil. Nə vaxt formada olarsa, baş məşqçi də o vaxt yarışlara onu buraxacaq. Ona görə də onu nə Daşkənddəki "Böyük Dəbilqə"də, nə də Avstriyadakı Qran-pridə görməyəcəyik. Formaya düşərsə, yəqin ki, ilk güləşəcəyi yarış Tbilisi və ya Antalyadakı "Böyük Dəbilqə" turniri olacaq", – deyə R.Rəsullu bildirib.

Qeyd edək ki, Rəşad Rəsullu saytımıza verdiyi son müsahibəsində ağır çəkili idmançıların tənbəl olduğunu dilə gətirmişdi.