"Sevindirici məqamlardan biri 2 oyunçumuzun Azərbaycan millisinə dəvət alması, Rumıniya və Niderlanda qarşı görüşlərdə iştirak etməsi oldu. Çalışacağıq ki, bu göstərici tədricən artsın".

Prosport.Az xəbər verir ki, bunu futzal üzrə Yüksək Liqada iştirak edən "Baku Fayr" komandasının baş məşqçisi Teymur Eyvazov Azərbaycan Futzal Federasiyasının mətbuat xidmətinə açıqlamasında deyib.

Yüksək Liqada yaranan fasilə ilə əlaqədar əksər komandalar istirahətə yollansa da, “Baku Fayr” məşqlərini əvvəlki qaydada davam etdirir. Əsas rəqibləri ilə müqayisədə 1 oyun az keçirən və qış fasiləsinə lider “Araz-Naxçıvan”dan 7, 2-ci pillədə yer alan “Neftçi” İK-dan 5 xal geridə yollanan ölkə kubokunun son qalibi bu fərqi aradan qaldırmaq niyyətindədir. 

Mütəxəssis 2023/2024 mövsümünün ilk yarısı başa çatsa da, komandasının istirahətə yollanmadığını bildirib: "Oyunlar olmasa da, hazırda məşqlərimizi davam etdiririk. Futzalçılarımızın formada qalması üçün həftədə 4 dəfə zalda məşqlər keçirik. Arxada qalan 9 oyunda axsadığımız məqamları gördük. Fasilədən sonraya daha hazırlıqlı olmağı planlaşdırırıq və bu səbəbdən yanvarın ilk günlərindən başlayaraq Bakıda təlim-məşq toplanışımız olacaq. Komandada əhval-ruhiyyə yüksəkdir, bunu məşqlər zamanı verilən tapşırıqların necə həvəslə yerinə yetirilməsindən də görürük".

Teymur Eyvazov əsas rəqiblərindən 1 oyun az keçirdiklərini xatırladıb: "Həmin matçda qələbə qazanıb çempionatın qalan görüşlərini də yüksək səviyyədə keçirmək, bu mövsümü arzu etdiyimiz və layiq olduğumuz yerdə tamamlamaq istəyirik. Heyətimizi də gücləndirməyə çalışacağıq. Mümkün variantları nəzərdən keçirəcəyik, alınsa, transferlər edəcəyik”.

Qeyd edək ki, "Baku Fayr" Yüksək Liqada 18 xalla 3-cü pillədə qərarlaşıb. Komanda ötən mövsüm çempionatda bürünc medal qazanmaqla yanaşı, həm də Azərbaycan Kubokunun qalibi olub.