Bu günlərdə 2 mötəbər turnirdə idmançılarımız iştirak etdi. 21-30 oktyabr tarixlərində Səudiyyə Ərəbistanının paytaxtı Ər-Riyadda III Ümumdünya Kombat Oyunları keçirildi. 24-29 oktyabrda isə Macarıstanın paytaxtı Budapeştdə karate üzrə dünya çempionatı təşkil olundu.
Prosport.Az hər 2 yarışda idmançılarımızın qazandığı yarışların nəticələrinə göz atıb.
Birincisi 2010-cu ildə Çinin paytaxtı Pekində (12 idman növü), 2-cisi 2013-cü ildə Rusiyanın Sankt-Peterburq (15 idman növü) şəhərində keçirilmiş multiidman yarışı 3-cü dəfə Asiyada – Ərəbistanda təşkil olundu. Bu dəfə 16 olimpiya və qeyri-olimpiya idman növləri arasında mübarizə getdi.
Azərbaycan bu yarışda 15 idmançı ilə qeyri-olimpiya idman növlərində təmsil olundu. Bunlar karate (1), kikboksinq (1), savat (1), qraplinq (2), pankration (5), uşu (1), kəmər güləşi (4) idman növlərində mübarizə aparan atletlər idi. Azərbaycan bu yarışda 2 qızıl, 1 gümüş və 5 bürünc medal qazandı. Əli Quliyev (pankration), Amin Quliyev (kikboksinq) qızıl, Hüseyn Məmmədli (karate) gümüş, Nadir İmaməliyev (qraplinq), Orxan Hətəmov (uşu), Esmira Məmmədova, Ramir Ağalarov (hər ikisi pankration) və Ariz Hüseynov (kəmər (alış) güləşi) bürünc medala yiyələndi.
Bu nəticə ilə Azərbaycan 31-ci, qonşu Ermənistan 30-cu olub. Medalların sayına görə isə Çin, Gürcüstan və Bolqarıstanla birgə 29-cu yeri tutmuşuq. 1-ci yerdə 53 medalla (21-17-15) Ukrayna, 2-ci sırada 51 medalla (12-20-19) meydan sahibi Səudiyyə Ərəbistanı və 3-cü pillədə 48 medalla (12-13-23) Qazaxıstan qərarlaşıb.
İndi isə əvvəlki 2 turnirlə nəticəni müqayisə edək. 2010-cu ildə Pekində keçirilmiş yarışda Niyazi Əliyev (67 kq, karate), Pərviz Abdullayev (71 kq, kikboksinq), Olesya Zamula (63 kq, güləş) qızıl və Kənan Sadıxov (75 kq, kikboksinq) bürünc medal qazanmışdı. Azərbayan 3 qızıl və 1 bürünc medalla 13-cü olmuşdu.
3 il sonra şimal qonşumuzda keçirilmiş yarışa 14 idmançı ilə yollanan Azərbaycan 6 medal qazanmışdı. Rafael Ağayev (75 kq, karate), Şahin Atamov (+84 kq, karate), Vüqar Kərəmov (66 kq, pankration) qızıl, Elnur Süleymanov (69 kq, boks) gümüş, Əbdülrəhman Şirinov (52 kq, boks) və Elvin Qəmbərov (81 kq, boks) bürünc medala yiyələnmişdi. 3 qızıl, 1 gümüş və 2 bürünc medalla Azərbaycan 11-ci yeri tutmuş və nəticəsini yaxşılaşdırmışdı.
Göründüyü kimi, əvvəlki yarışda daha az idmançı ilə indikindən daha yaxşı nəticə göstərilib. Ümumilikdə isə III Ümumdünya Kombat Oyunlarında medalların keyfiyyətinə görə nəticə daha pis olub.
Elə karate üzrə dünya çempionatında da nəticələr yaxşı deyil. Yalnız 68 kq çəki dərəcəsində ukraynalı legionerimiz İrina Zaretskaya 3-cü dəfə dünya çempionu ola bildi. Karatedə xeyli bizdən irəlidə olan İranın 21 karateçisinə Şengen vizası verilməsə də, Azərbaycan bu yarışdan cəmi 1 qızıl medalla qayıda bildi. Bu nəticə ilə Çin və Yunanıstanla birgə 8-ci olduq. Maraq üçün qeyd edək ki, karatenin vətəni Yaponiya 1-ci (4-1-1), Misir 2-ci (2-2-4) və Türkiyə 3-cü (2-2-1) yeri tutdu.
Ötən dünya çempionatında – 2021-ci ildə BƏƏ-nin Dubay şəhərində keçirilmiş yarışda isə 1 qızıl və 2 bürünc medalla 7-ci olmuşduq. Onda İrina Zaretskaya çempion olmuş, Asiman Qurbanlı (+84 kq) və Rafael Ağayevin də çıxış etdiyi kişi kumite millimiz bürünc medala yiyələnmişdi. Bu dünya çempionatında isə Ağayevsiz kişi millimiz bürünc medalın astanasında uduzdu.
Səbuhi Musa