Avropa Kubokunun II mərhələsində Mingəçevirin kişilərdən ibarət "Kür" həndbol komandasının rəqibi olan Xorvatiyanın "Sesvete" klubunda Azərbaycan səfəri öncəsi baş məşqçi dəyişikliyi baş tutub.

Prosport.Az xəbər verir ki, vaxtı ilə Xorvatiya millisinin sağ cinah müdafiəçisi olmuş, 2019-cu ildən bu komandanı çalışdıran 59 yaşlı Silvio İvandiya şəxsi səbəblər üzündən istefa verib.

Onun yerinə Xorvatiya millisi ilə olimpiya və dünya çempionu olmuş 43 yaşlı İqor Vori təyin olunub. Yeni baş məşqçinin debütü isə yaxşı alınıb. Belə ki, Xorvatiya çempionatında "Varajdin"lə səfərdə keçirilən derbi matçında "Sesvete" 37:31 hesabı ilə qalib gəlib. "Kür"ə ilk oyunda 11 qol vurmuş Filip Turçiç, eləcə də Nikola Finek və Davor Qavriç hərəyə 7 dəfə fərqlənib. "Kür"lə oyunda 17 seyv etmiş qapıçı Filip Periç bu dəfə 13 qurtarışla yadda qalıb.

Xatırladaq ki, "Kür" oktyabrın 14-də Xorvatiyanın paytaxtı Zaqrebdə keçirilmiş ilk görüşdə bu rəqibinə 15:30 hesabı ilə məğlub olub. Həmin görüşdə komandamız Şengen vizası ala bilmədiyi üçün 2 rus və 3 nigeriyalı legionerinin xidmətindən istifadə etməkdən məhrum olub. 3 serb və 2 monteneqrolu legionerin, ümumilikdə 9 oyunçunun ümidinə qalan "Kür" nəticədə 15 top fərqi ilə uduzub.

Komandamız sabah Mingəçevirin "Kür" Olimpiya Tədris-İdman Mərkəzində "Sesvete" ilə cavab oyununa çıxacaq. Görüş saat 18:00-da başlayacaq. Matçı çexiyalı hakimlər briqadası idarə edəcək.