Həndbol üzrə Avropa Kubokunda mübarizə aparan Azərbaycanın 2 kişi komandasının matçlarını idarə edəcək hakimlər müəyyənləşib.

Prosport.Az-ın xəbərinə görə, "Azəryol" II təsnifat mərhələsi çərçivəsində sabah ilk oyununu İtaliyanın Briksen (italyanlar Bressanone adlandırır – red.) şəhərində eyniadlı komandaya qarşı keçirəcək.

Bakı vaxtı ilə saat 21:00-da başlayacaq görüşü niderlandlı hakimlər idarə edəcək. Bunlar Ruud və Pol Xerats qardaşlarıdır. Sloveniyalı Leopold Kalin isə Avropa Həndbol Federasiyasının nümayəndəsi olacaq.

Gənclər və İdman Nazirliyinin təşəbbüsü ilə yaradılmış "Kür" komandası isə II mərhələdə cavab oyununa çıxacaq. Debütant olan "Kür" komandası oktyabrın 21-i saat 18:00-da Mingəçevirdə Xorvatiyanın "Sesvete" komandasını qəbul edəcək. Oyunu çexiyalı Marek Bareş və Yakub Uhlir idarə edəcək, türkiyəli Kənan Gökmən isə nümayəndə olacaq.

Qeyd edək ki, "Kür" ilk matçda oktyabrın 14-də Xorvatiyanın paytaxtı Zaqrebdə "Sesvete"yə 15:30 hesabı ilə uduzub. III mərhələyə çıxmaq üçün 15 xallıq fərqin cavab qarşılaşmasında aradan qaldırılması lazım gələcək.