Azərbaycanın bütün qadın həndbol komandaları avrokubokların ilk mərhələsindəcə mübarizəni dayandırıb.

Prosport.Az-ın xəbərinə görə, EHF Avropa Kubokunda "Kür"ün ardından, "Azəryol" və "Qarabağ" da rəqiblərinə qalib gələ bilməyib.

Belə ki, "Azəryol" Bosniya və Herseqovinanın Zavidoviçi şəhərində "Krivaya"ya hər 2 oyunda uduzub: 29:31, 25:26.

"Qarabağ" isə daha biabırçı nəticə ilə üzləşib. İşğaldan azad olunmuş bölgəmizi təmsil edən, loqosunda Şuşanın simvolu Xarıbülbülü əks etdirən komanda İspaniyanın Qranulyes şəhərində “KH-7 BM Qranulyes” klubuna böyük hesablarla yenilib: 15:48, 18:41. Göründüyü kimi, 2 oyuna 33 qol vurmuş komandamız rəqibindən 89 top buraxıb.

Hələ sentyabrın əvvəlində bu biabırçı məğlubiyyətin gözləniləcəyini, bu səbəbdən matçların hər ikisinin səfərə salındığını xəbər vermişdik. Gənclər və İdman Nazirliyinin maliyyəsi ilə yaradılmış "Kür" komandası isə ötən ay Mingəçevirdə İtaliyanın "Yomi Salerno" klubuna hər 2 matçda uduzmuşdu: 19:29, 19:36.

Qeyd edək ki, kişilərdən ibarət “Azəryol” komandamız EHF Avropa Kubokunun II mərhələsində “Briksen” (İtaliya), “Kür” isə Xorvatiyanın “Sesvete” kollektivi ilə mübarizə aparacaq. İlk oyunlar oktyabrın 14-15-də, cavab matçları oktyabrın 21-22-də keçiriləcək.