Kişi və qadınlardan ibarət həndbol komandalarımız Avropa Həndbol Federasiyası (EHF) kuboku uğrunda yarışlarda iştirak etmək üçün məşqlərə başlayıb.

Prosport.Az xəbər verir ki, təmsilçilərimiz avqustun 15-dən hazırlıq keçirlər. Artıq qadınlardan ibarət komandaların oyunlarının vaxtı və keçiriləcək məkanlar müəyyənləşib.

Yarışa 1/32 final mərhələsindən qatılacaq təmsilçilərimizdən “Azəryol” Bosniya və Herseqovinanın “Krivaya” komandası ilə 30 sentyabr – 1 oktyabr tarixlərində rəqib meydanında görüşəcək. İyulun 18-də Avstriyanın paytaxtı Vyanada atılmış püşkatmada hər 2 oyunun Bakıda keçirilməsi nəzərdə tutulsa da, danışıqlardan sonra matçların Zavidoviçi şəhərində keçirilməsi qərara alınıb. 

“Qarabağ” da İspaniyanın “KH-7 BM Qranulyes” kollektivi ilə sentyabrın 30-u və oktyabrın 1-də səfərdə – Kataloniya vilayətinin Qranulyes şəhərində qarşılaşacaq. Halbuki əvvəlcə ilk oyunun Bakıda olması nəzərdə tutulmuşdu.

Bəs 2 klubumuzun da Bakıda oynamaqdan imtinasının əsl səbəbi nədir? Məsələ burasındadır ki, 2 komandamızın da ilk mərhələdəcə mübarizəni dayandıracağı heç kimdə şübhə doğurmur. Bu səbəbdən də heç bir komanda ötən ay U-17 qızlar millimizin Bakıda EHF çempionatında yaşadığı fiaskonu yenə doğma azarkeşlər önündə yaşamaq istəmir. Acı nəticə olsun, amma səfərdə, səs-səmirdən uzaqda olsun... onlar belə fikirləşir. Amma biz nəticələri diqqətdə saxlayıb işıqlandıracağıq. Əks halda, jurnalist etikasına tüpürmüş olarıq.   

Yeni yaradılmış “Kür” komandası isə İtaliyanın “Yomi Salerno” komandası ilə 23-24 sentyabr tarixlərində Mingəçevirdəki “Kür” Olimpiya İdman Mərkəzində üz-üzə gələcək.

2 oyunun nəticəsinə görə üstünlük qazanan komanda növbəti mərhələyə adlayacaq.

Qeyd edək ki, kişilərdən ibarət “Azəryol” I mərhələnin “Amber” (Litva) – “Briksen” (İtaliya) cütünün qalibinə rəqib olacaq. “Kür” isə Xorvatiyanın “Sesvete” kollektivi ilə mübarizə aparacaq. İlk oyunlar oktyabrın 14-15-də, cavab matçları oktyabrın 21-22-də keçiriləcək.