Futzal üzrə UEFA Çempionlar Liqasının əsas mərhələsində iştirak edəcək “Araz-Naxçıvan”ın yer aldığı 5-ci qrupun bütün iştirakçıları müəyyənləşib.

Prosport.Az xəbər verir ki, ilkin mərhələ oyunlarından sonra C qrupunun qalibi “Buba Mara” (Bosniya və Herseqovina) və D qrupunun lideri “Uypeşt” (Macarıstan) Naxçıvan təmsilçisinin rəqibləri olub.

Püşkatmanın nəticəsinə əsasən, 5-ci qrupa E qrupunun qalibi qoşulmalı idi. Lakin həmin qrupda Ermənistan çempionu “Unisport” birinci yeri tutub. UEFA İcraiyyə Komitəsinin qərarına əsasən, Azərbaycan və Ermənistan təmsilçilərinin eyni qrupda yer almasına icazə verilmədiyindən E yox, D qrupunun qalibi 5-ci qrupa vəsiqə qazanıb.

Beləliklə, Polşada keçiriləcək əsas mərhələdə “Araz-Naxçıvan”la yanaşı, meydan sahibi “Piast” (Polşa), “Buba Mara” və “Uypeşt” mübarizə aparacaq.

Qeyd edək ki, “Araz-Naxçıvan” UEFA Çempionlar Liqasında 21-ci dəfə iştirak edəcək. Naxçıvan təmsilçisi bu göstəriciyə görə yalnız Qazaxıstanın “Kayrat” klubundan geri qalır.

Turnirin əsas mərhələsinin oyunları oktyabrın 27-dən noyabrın 1-dək Polşada keçiriləcək.