Azərbaycanın 19 yaşadək futzalçılardan ibarət yığması Belarusda təşkil olunan II MDB Oyunlarında ilk matçını keçirib.

Prosport.Az xəbər verir ki, milli komandamız ev sahibləri ilə qarşılaşıb və görüş rəqibin böyükhesablı qələbəsi ilə yekunlaşıb – 7:1. U-19-un heyətində yeganə qolu Qüdrət Qasımzadə vurub.

Millimizin baş məşqçisi İlqar Aslanov ilk oyunla bağlı danışıb: “Meydan sahiblərinə qarşı oynamaq hər zaman çətin olur. Üstəlik, rəqibimiz də güclü komanda idi. Heyətimizdə yer alan futzalçıların bir neçəsi ilk dəfə bu cür yarışda iştirak etdiklərinə görə həyəcanlı idilər. Qapıçılarımız da ümidləri doğrultmadı, zəif çıxış etdilər. Bir qədər inamlı oynasaydılar, hesabdakı fərq böyük olmazdı. Futzalçılar bu cür yarışlarda “bişirlər”. Təcrübə toplamaq baxımından turnir komandamızın üzvləri üçün faydalı olacaq”.

Qeyd edək ki, Azərbaycan millisinin növbəti matçı bu gün Qırğızıstana qarşı olacaq.