Beynəlxalq Cüdo Federasiyası (IJF) gənclər arasında bu il keçiriləcək dünya çempionatının yerini dəyişib.

Prosport.Az xəbər verir ki, 22-25 oktyabr tarixlərində İordaniyanın paytaxtı Əmmanda keçirilməli olan dünya çempionatı Yaxın Şərqdəki vəziyyətə görə təxirə salınıb.

Açıqlamada deyilir: "Bu qərar daha geniş regionda dəyişən vəziyyət nəzərə alınmaqla verilib. Hazırlıqlar müsbət və əməkdaşlıq ruhunda irəliləsə də, beynəlxalq səyahətlərə, logistikaya və ümumi tədbir şəraitinə təsir edən mövcud qeyri-müəyyənliklər IJF-ni təxirə salınmanın hazırda ən uyğun addım olduğu qənaətinə gəlməyə vadar edib.

İdmançıların, rəsmilərin və bütün maraqlı tərəflərin təhlükəsizliyi və rifahı federasiyanın ən yüksək prioriteti olaraq qalır. Tədbirlərin təhlükəsiz, əlçatan və sabit bir mühitdə keçirilməsinin təmin edilməsi beynəlxalq cüdo yarışlarının bütövlüyünü və standartlarını qorumaq üçün vacibdir".

Gənclər arasında dünya çempionatının yeni məkanı isə Özbəkistanın paytaxtı Daşkənd olacaq. Yeni tarix də bəllidir. Dünya çempionatı 19-22 noyabrda keçiriləcək.

Bu isə o deməkdir ki, perspektivli gənc cüdoçularımız 4-11 oktyabrda Bakıda keçiriləcək böyüklərin dünya çempionatında da çıxış edə bilər. Əvvəl həm gənclərin, həm də böyüklərin dünya çempionatı eyni ayda olduğundan, bu mümkünsüz idi. Bunu Azərbaycan Cüdo Federasiyasının icraçı vitse-prezidenti Rəşad Rəsullu saytımıza müsahibəsində bu formada bildirmişdi: 

"Gənclər komandasının əsas hədəfi oktyabrda İordaniyanın paytaxtı Ammanda keçiriləcək dünya çempionatıdır. Böyüklər arasında dünya çempionatı ilə gənclərinki arasında təxminən 2 həftə fərq var. Ona görə də eyni idmançının həm böyüklərdə, həm də gənclərdə eyni vaxtda çıxış etməsi mümkün deyil".

Səbuhi Musa