"Məsələ komanda daxilində olmuşdu və komandanın sirri idi, daxildə də qalmasının tərəfdarı idim. Amma açığı, məsələnin bu qədər böyüməsi və jurnalistlərin marağının olması mənə təəccüblü gəldi".

Prosport.Az xəbər verir ki, bunu futzal üzrə Azərbaycan yığmasının heyətindən uzaqlaşdırılan Rövşən Hüseynli deyib.

Qazaxıstanın "Astana" klubunun qapıçısı sosial şəbəkə hesabında paylaşım edərkən, komandanın düşərgəsində baş verənlərə aydınlıq gətirib: "Öncə milli komanda 6 aprel saat 12:00 məşqindən sonra bazaya yerləşib. Mən klubumla 4 aprel 17:00 və 5 aprel 17:00 tarixlərində çempionatın XXIX və XXX turlarında əsas heyət qapıçısı olaraq oyunlar keçirmişəm. 6 aprel plan əsasında klubumda bərpa prosesi olmalı və sonra ayın 7-dən millinin düşərgəsinə qoşulmalı idim. Məşqçi və klub rəhbərliyi ilə danışdım və anlayışla qarşılayıb məni bərpa prosesindən azad etdilər. Legioner həyatı yaşayıram, millinin toplanışında ailəmi və övladımı görmək üçün bu addımı atdım. Bakıya gələ biləcəyim birbaşa reys ayın 5-i gecə idi.

Aprelin 6-da gecə Astana – Bakı reysi ilə gəldim və komandanın axşam məşqində iştirak etdim. Məşqdən sonra məlum məsələləri deyib sabah məşqə qoşula biləcəyimi soruşdum. Yox cavabı aldım. Fikrimi deyib anlayış gözlədim. Hazırlıq üçün tez gəldiyim halda intizamsızlığa görə heyətdən kənardayam. Hər zaman millidə layiqincə xidmət etmişəm və dəvət olunduğum müddətdəcə bunu edəcəyəm də".

Qeyd edək ki, millinin baş məşqçisi Vitali Borisov Rövşən Hüseynli isə intizam qaydalarını pozduğuna görə düşərgədən kənarlaşdırılıb.