"Dünya çempionatının başlanmasına təxminən 2 ay vaxt qalsa da, artıq 32 ölkə bizə müraciət ünvanlayıb".

Bu barədə Prosport.Az-a Azərbaycan Atıcılıq Federasiyasından məlumat verilib.

Atçılıq Federasiyası Ermənistanın atıcılıq üzrə millisinin baş məşqçisi Seyran Nikoqosyanın Bakıdakı dünya çempionatında iştirakına münasibət bildirib:

"Bizə müraciət edən ölkələrdən biri də Ermənistandır. İştirak üçün formanı doldurub göndərən bütün komandalara verilən cavab eynilə onlara da verilib.

Bu il Bakıda 60-dan çox ölkənin qatıldığı Dünya Kuboku gerçəkləşib. Həmin yarış böyük uğurla və hər kəsin təhlükəsizliyinin ən yüksək səviyyədə təmin olunması ilə baş tutub. 100-dən artıq ölkənin mübarizə aparacağı dünya çempionatının Bakıda keçirilməsi Azərbaycana göstərilən etimaddan irəli gəlir".

Qeyd edək ki, atıcılıq üzrə dünya çempionatı avqustun 14-dən sentyabrın 3-dək davam edəcək.